KUCHING: Kopi udah ditemu ke tau ditanam enggau chara ke besai ba sitak Mambong, pia ku Menteri Muda Perengka Pengangkut Datuk Dr Jerip Susil.
Iya ke mega Kaban Kunsil Nengeri Mambong madah, dianggarka 23,000 ikar tanah udah ditemu tau alai nanam nya ba sitak Mambong.
“Projek nanam kopi tu dibuka ngagai semua peranak ti bisi ati sereta ngembuan tanah endur nanam.
“Perintah udah merambu numbuhka sebuah kilang alai memproses kopi ke mega deka nyadi palan ngumpul asil kopi iya nya Palan Ngumpul, Memproses enggau Mungkus CPPC ba Palan Ngaga Pemansang Padawan di Bayur,” ku iya.
Iya madah munyi nya lebuh bejadi Program Outreach Betanam Betupi Komuniti tauka AgriCOP ke diatur Serakup Segu Bunuk nengah kerejasama enggau Opis Betanam Betupi Sarawak Bagi Menua Kuching di St Paul Parish Hall, Bunuk ditu kena Hari Enam nyin tadi.
Taja pia ku Dr Jerip, tetiap pesereta projek mesti dulu ngaga dokumentasyen tanah Hak Adat Bumiputera (NCR) sida.
Ku iya, proses tu tau digaga nengah Gerempung Bansa Dayak Bidayuh (DBNA) kena ngulihka surat hak ngempu tanah ari Opis Tanah enggau Survei ari baruh Seksyen 18 Kanun Tanah Nengeri.
Serakup Segu Bunuk ti bechairmanka Lister Nonem Moteng, deka megai tanggungpengawa nentuka pemujur projek nanam kopi nya.
Projek deka dipejalaika nengah chara beserumpu ti mungkur tujuh buah genturung pendiau ke ari baruh pegai Serakup Segu Bunuk, lalu nya nyadi batang juluk serakup kena ngangkatka tikas pengidup enggau sosio-ekonomi peranak menua nya.
Ba pengerami nya, Lister bel bisi nyuaka pom minta projek ari 150 iku peminta ti disempulang enggau surat minta bantu belanja ngagai Dr Jerip ke sepenyampau RM750,000 kena melanja projek nya.