Anda di sini

LKM di Sarawak mengkang baka ke sebedau tu

Advertisement
 Wee (tiga ari kiba), nyuaka sengkabung idung enggau mulut ngagai Mohd Faizal seraya dikemataka Mohd Syafiq (dua ari kiba), Huang (tiga kanan) Huang enggau ke bukai.
TERIMA MIH: Wee (tiga ari kiba), nyuaka sengkabung idung enggau mulut ngagai Mohd Faizal seraya dikemataka Mohd Syafiq (dua ari kiba), Huang (tiga kanan) Huang enggau ke bukai.

SIBU: Opis Menteri Perengka Pengangkut deka terus enggau rega Lisin Perengka Pengangkut (LKM) tauka chukai jalai Sarawak baka ti diasaika rayat Sarawak diatu.

Menteri Perengka Pengangkut Datuk Seri Dr Wee Ka Siong madah, rega chukai ba Semenanjung, Sabah enggau Sarawak enda sebaka, ke alai rega chukai jalai di Sabah enggau Sarawak murah agi.

Berindik ari nya, ku iya, perintah nadai ngembuan sebarang pelin deka nyemakaka rega tu baka ba Semenanjung.

“Kitai deka terus ngetanka nama pan (rega bayar LKM) ti benung diasaika rayat Sarawak diatu.

“Kebuah pia laban faktor gaya jalai enggau faktor bukai. Nyema baka suba, kitai ngembuan struktur chukai ti endang bebida kelebih agi (ti ngaul) lisin perengka pengangkut,” ku iya.

Iya madah munyi nya lebuh ti ditanya pengarang berita sekalika Opis Menteri Perengka Pengangkut ngembuan pelin deka nyemakaka rega LKM tauka chukai jalai di selampur Malaysia.

Wee ditemu pengarang berita pengudah ngelawa ke Opis Perengka Pengangkut Darat (JPJ) Pampang Sibu ditu, kemari.

Taja pia, Wee meri jaku tangkan ngagai penguna jalai alun kelebih agi di Semenanjung ngambika enda salah kena LKM tu ke ngulihka rega LKM ti murah agi.

“Bisi kes ke alai siku orang ti ngempu (entukar mar) Porsche ke deriba di Semenanjung, tang (entukar nya) direjista ditu (Sabah/Sarawak).

“Di Sarawak, kita semina patut mayar beberapa ribu aja, tang ba Semenanjung kita deka mayar urung RM500,000.

“Berindik ari nya, kita mesti mayar (rega LKM) ba endur perengka pengangkut kita nya dikena, nyema di Semenanjung kita mesti nitihka rega din, nyema di Sarawak kita mayar nitihka rega ditu,” ku iya nyemetak.

Sama bisi iya nya Direktor JPJ Sarawak Mohd Syafiq Anas Abdullah, Kaban Kunsil Nengeri (ADUN) Repok Dato Sri Huang Tiong Sii, Ketuai Opis JPJ Sibu Mohd Faizal David Jemat enggau ke bukai.

Advertisement