Anda di sini

Unit MEKAR JPN ditumbuhka di bagi menua Sri Aman

KUCHING: Opis Pengerejista Bansa (JPN) Bagi Menua Sri Aman nengah Unit MEKAR (Menyemai Kasih Rakyat) deka berengkah chakah bejalaika operasyen ‘Mobile Ehsan’ mantu orang ti bisi penanggul enggau dokumen pengelala diri lebih agi raban orang lunggar umur, orang nyelai pendiau (OKU) enggau ke enda dapat kereja enggau mindah dapat agi.

Kepala Opis JPN Bagi Menua Sri Aman, Mas Shamsuddin Mohamad madahka, unit MEKAR nya iya nya unit baru ditumbuhka dalam taun tu ba JPN Sri Aman.

Setipak enggau pemansang ke maya hari tu ku iya, JPN udah bejalaika rasionalisasi servis iya nya ngaga ‘penjenamaan semula’ Unit Khas bergerak (UKB) ngagai Unit MEKAR.

“UKB sebedau tu semina bisi di Miri, Bintulu enggau Kuching tang nengah meri nama baru tu Unit MEKAR dikerembai sereta ditumbuhka ba JPN Sri Aman, JPB UTC MIri, JPN Bintulu, JPN UTC Sibu, JPB Kapit enggau JPBN Indu Opis Kuching.

“Unit MEKAR ngerembaika pengawa ukai semina ngagai peranak di menua ulih tang mega meri servis ngagai peranak di tebing pantai-pesisir pantai-, orang nyelai pendiau -OKU-, raban uzur nengah operasyen Mobile Ehsan.

“Nambahka nya bejalaika operasyen Prihatin ti bekaul enggau orang ti kena penusah rumah angus,operasyen ba palan pengentap pendiau pesakit mental, rumah pengelantang pendiau, operasyen ke jil, operasyen di PULASAR ungkup anggota PDRM ke baru dichiri sereta operasyen khas bukai,” ku iya madah ngagai Utusan Borneo.

Setipak enggau slogan JPN iya nya ‘Rakyat Di Hati JPN’, JPN Sri Aman seruran bebendar deka meri servis ti pemadu manah ngagai rayat.

Ku iya, berindik ari penyadi pandemik COVID-19, Unit MEKAR nengah operasyen Mobile Ehsan naka ke diatu semina udah mantu mutarka penanggul lenyau enggau nganti MyKad iya nya mantu Malaysia Andut di Rumah Nyanyi, Gran C, Sri Aman enggau Nawai Tuah ba Taman Tiara, jalan Brayun, Sri Aman.

“Kami baru berengkah sereta deka chakah bejalaika operaysen Mobile Ehsan ti dipejalaika nengah Unit MEKAR.

“Sebarang pekara ti deka ditanya bekaul enggau Unit MEKAR ba kandang menua di Sri Aman, tau ditanya ngagai JPN Bagi Menua Sri Aman ba lumur 083-325095,” ku iya ti nyadi ketuai unit nya.

Advertisement