Anda di sini

Peranak ke beumur ngelui 60 taun diperansang minta KGC

 Fatimah (tengah) begambar begulai enggau kaban strategik ke baru ungkup di Sibu ba Program Nyain Memorandum of Understanding (MoU), ditu kemari.
UNGKUP RAYAT: Fatimah (tengah) begambar begulai enggau kaban strategik ke baru ungkup di Sibu ba Program Nyain Memorandum of Understanding (MoU), ditu kemari.

SIBU: Peranak Sarawak ti udah lunggar umur sereta beumur 60 taun ke atas diperansang ngerejista diri minta Kad Emas Kenyalang (KGC), ungkupka pemaik enggau pengelantang pengidup raban nya.

Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit, Dato Sri Fatimah Abdullah madah, tu inisiatif ari opis menteri nya kena nyungkak tikas pengelantang pengidup enggau nyaga pekara belanja raban ti udah lunggar umur ba nengeri tu.

Nitih ku iya, urung 100 buah kompeni di sereta nengeri udah ngerejista diri nyadi kaban strategik ungkup KGC berengkah ari sehari tu. Ari penyampau nya, 11 buah kompeni beasal ari Sibu.

“Tu nandaka rayat Sarawak iya nya orang ti manah ati. Sida tu udah sama mantu sereta meri pemaik ba dalam komuniti kitai, tebal agi ngagai raban ti udah lunggar umur.

“Tu mega siti kelai ke manah ari peranak kitai di Sarawak,” ku iya lebuh ba Program Nyain Memorandum of Understanding (MoU) bekaul enggau kaban strategik baru ungkup KGC ba sebuah hotel tebilang di Sibu ditu, kemari.

Ba pengawa tu, Fatimah ngemataka pengawa nyain MoU empat iku kaban strategik ke baru diatu iya nya Palan Berubat Tebangkar Sibu, Farmasi Unicare, Hotel RH  sereta Organisasyen Hock Peng (Hotel Li Hua enggau Hotel Medan).

Berindik ari nya, iya ngarapka mayuh agi kompeni ari Sibu ulih nyereta enggau nyadi kaban strategik ungkupka pemaik orang ti udah lunggar umur.

Ungkup ke diatu ku Fatimah, Mukah mega ngembuan tiga kaban strategik ungkup KGC.

Ku iya, kaban kunsi strategik iya nya vendor tauka kompeni ti meri servis tauka perengkaguna enggau diskaun rega enggau rebet ngagai raban ti lunggar umur di Sarawak.

“Nyadi kaban strategik, nuan meri peluang ngagai mensia mayuh dikena nyungkakka servis sosial ungkup orang ti lunggar umur lalu mandangka pengibuh nuan ngagai pengelantang pengidup raban nya,” ku iya baru.

Nitih ku Fatimah, kena taun 2030 ila, 14 peratus populasyen peranak Malaysia iya nya raban ti udah lunggar umur.

“Ungkup Sarawak, penyampau orang ti lunggar umur iya nya 16 peratus lalu penyampau tu besai agi enti dibanding enggau penyampau ba tikas menua nya,” ku iya nambah.

Kelimpah ari tu, Fatimah madahka opis menteri iya udah nerima 170,844 iti pom ngerejista KGC naka 11 September empai lama.

Ari penyampau nya, 133,805 kad KGC udah dichelak enggau 74,702 iti udah diagihka.

Berindik ari penyampau tu, 422 pom rejista udah dikemendarka enggau penyampau belanja ti berega RM1.2 juta.

Advertisement