Anda di sini

Menteri KKMM udah ngulu Program ‘Walkabout Info On Wheels’ kemari

 Saifuddin (kiba) nyadungka tambai ngagai raban dagang ba Makit Sibu Jaya ditu, kemari.
ENGKITA: Saifuddin (kiba) nyadungka tambai ngagai raban dagang ba Makit Sibu Jaya ditu, kemari.

SIBU: Menteri Komunikasyen enggau Multimedia Malaysia (KKMM) Datuk Saifuddin Abdullah udah ngelimpangka diri enggau ngulu Program ‘Walkabout Info On Wheel’ ba Bandong Walk, di Sibu ditu, kemari.

Iya datai ba palan nya urung pukul lapan pagi lalu diuluka Ketuai Sekretari KKMM Dato’ Suriani Ahmad, Sapit Ketuai Sekretari KKMM Shakib Ahmad Shakir enggau Sapit Ketuai Direktor Opis Pemadah Malaysia (JAPEN) Dato’ Sukari Abdul Hamid.

Sama bisi iya nya Sapit Ketuai Direktor (Pekara Digital) JAPEN Hashim Bedu enggau Direktor Opis Pemadah Nengeri Sarawak Swady Guliling.

Saifuddin ngawakka diri pengelama urung sejam ba program nya sereta ngabas sekeda kedai kena ngagihka tambai Malaysia ngagai raban dagang ba dia.

Ba program tu mega, Saifuddin bisi ngaga kelai ‘flag-off’ ungkup program Bekayuh Ngerindang Ati Beserimbai enggau Hari Malaysia 2020 ti diketuaika Menteri Muda Pelajar, Sains enggau Pansik Teknologi Dr Annuar Rapa’ee.

Pengudah nya, iya neruska Program Walkabout Info On Wheels ba Makit Sibu Jaya ditu, urung pukul 9.30 pagi sebedau bejalai ngabas ngagai RTM Sibu kena pukul 11 pagi.

Muak ke malam, Saifuddin deka enggau ngulu program nyambut Hari Malaysia 2020 ba Stadium Tetutup Sibu.

Program nya digulu Menteri Besai Tan Sri Muhyiddin Yassin, Yang di-Pertua Negeri, Tun Pehin Sri Abdul Taib Mahmud, Kepala Menteri Sarawak Datuk Patinggi Abang Johari Tun Abang Openg enggau pengari ari Perintah Sabah.

Advertisement