SIBU: Naka 31 Ogos taun tu, Opis Menteri Pengerai Malaysia (KKM) udah ngemendarka peminta Tabung Bantu Perubat (TBP) ungkup 1,871 iku pesakit ti begunaka ungkus sepenyampau RM23 juta.
Menteri Pengerai Dato Sri Dr Adham Baba madah, ari penyampau nya, 618 iku pesakit bekaul enggau kardiologi, ortopedik (415), otorinolaringologi (242) enggau ke bukai (560).
“Ungkup nengeri Sarawak, ba taun tu sepenyampau RM2.74 juta bantu udah dikemendarka ngagai 171 iku pesakit.
“Pesakit ti pemadu mayuh nerima bantu iya nya ari disiplin ortopedik iya nya bisi 71 iku,” ku iya lebuh bejaku ba Pengawa Nyuaka Bantu TBP ngagai 10 iku penerima di Sepital Sibu, kemari.
Nitih ku Dr Adham, TBP berengkah dipejalaika ba taun 2005 enggau agih belanja beungkus RM25 juta sebedau ditambah ngagai RM49 juta ninting taun kenyau taun 2014.
Naka ke diatu ku iya, bisi 63,000 iku pesakit udah nerima pemaik ari TBP ke alai ba taun 2017, bisi 5,814 iku pesakit nerima bantu sepenyampau RM49 juta.
“Ba taun 2018, bisi 6,024 iku pesakit nerima bantu sepenyampau RM53 juta enggau ba taun 2019, bisi 4,503 iku pesakit nerima bantu RM46 juta,” ku ya nerang.
Nengah TBP ku Dr Adham, KKM nyendiaka bantu ngagai pesakit ti kurang penatai pemisi kena melanja sebagi tauka penuh ungkus kena berubat, meli kereban rehabilitasyen tauka ubat.
Perintah ku iya, nyendiaka perengkaguna tu kena mantu rayat ngangkatka tikas pengerai enggau lebih manah agi ngambika sida ulih neruska idup enggau meransang ngagai sosio-ekonomi menua.
“Pengawa meri bantu nengah TBP dipejalaika nitihka prosedur enggau atur ti udah ditetapka ngambika tu meri pengelurus enggau hak sebakangagai rayat ti patut nerima bantu nya.
“Pesakit ti deka minta bantu TBP tu mesti betemu enggau pemesai perubat ba sepital perintah tauka palan perubat universiti ngagai Opis Kereja Sosial Perubat sepital nya,” ku iya.
Sama bisi datai iya nya Sapit Menteri Pengerai Datuk Aaron Ago Dagang, Direktor Opis Pengerai Sarawak Dr Chin Zin Hing, Direktor Bagi Pemansang Perubat KKM Dato Dr Norhizan Ismail, Direktor Sepital Sibu Dr Muhmmad Ng Siah Huat enggau Pemesai Pengerai Bagi Menua Sibu Dr Teh Jo Hun.