Anda di sini

Hari Malaysia taun tu besai reti ba Malaysia Andut

 Nawai nerima MyKad baru iya ti disuaka Mas Shamsuddin sereya disempulang Razwin (duduk, dua kiba) enggau sida ke bukai, apin lama.
MYKAD BARU: Nawai nerima MyKad baru iya ti disuaka Mas Shamsuddin sereya disempulang Razwin (duduk, dua kiba) enggau sida ke bukai, apin lama.

KUCHING: Hari Malaysia taun tu mai reti ti besai ngagai Malaysia Andut ari Rumah Nyanyi, Gran C, Sri Aman laban ti ulih nganti MyKad iya ti rusak nengah servis ‘Mobile Ehsan’ ti dipejalaika Unit MEKAR (Menyemai Kasih Rakyat) Opis Pengerejista Bansa (JPN) Bagi Menua Sri Aman.

Unit MEKAR JPN Bagi Menua Sri Aman ti betuai Siti Razwin Almin sereta disempulang tiga pengereja pengawa JPN bejalaika siti operasyen pengerejista nganti MyKad Malaysia ti udah kelalu tuai sereta enda dapat kereja enggau mindah dapat agi.

Nama Malaysia iya nya digaga nyerumba hari penumbuh Malaysia kena 16 September 1963.

“Maya kami bejalaika operasyen tu, Malaysia madah diri chukup sinu sereta gaga laban Unit MEKAR JPN Sri Aman sanggup datai ke rumah lalu nganti MyKad iya laban iya ti tusah deka mindah enggau datai nganti kediri ngagai opis JPN,” ku Razwin.

Ba hari ti sama Mobile Ehsan JPN Bagi Menua Sri Aman mega mantu nganti MyKad Nawai Tuah ba Taman Tiara, Jalai Brayun, Sri Aman ti lenyau.

“Nawai siku peranak lunggar umur sereta tusah deka mindah mega sama udah dibantu bulih MyKad baru nengah operasyen pengerejista tu,” ku Razwin.

Kelimpah ari nya Pegawai Pengerejista JPN Bagi Menua Sri Aman, Mas Shamshuddin Mohammad bisi datai ngagai simbolik pengawa nyuaka MyKad ngagai Malaysia.

“Aku chukup gagit laban ulih nyerahka MyKad ngagai Malaysia nyerumba Hari Malaysia sereta nama iya ti nyelai iya nya ngelai hari besejarah menua.

“Nengah unit MEKAR kami ulih mantu raban bansa menua tu mutarka penanggul sida lebih agi raban orang lunggar umur, orang nyelai pendiau (OKU) sereta sida ti udah enda dapat kereja enggau mindah dapat agi ngaduka pekara bekaul enggau dokumen pengelala diri,” ku iya.

Advertisement