KUCHING: Sarawak Energy Berhad (SEB) benung matau gaya ke nyadi di Sarawak berindik gaya hari ti balat jai enggau ujan enda ngengetu ba sekeda kandang menua di selampur nengeri.
Pekara pemadu dikemerat pemekal utiliti iya nya nyaga pengelikun mensia mayuh ari penusah ketegal elekterik enggau raban sida komited bejalaika pengawa.
“SEB deka nutup bekal ba substesyen enggau perengkaguna ke bukai berindik ari penusah ampuh bah enggau tikas ai ti majak niki ti tau ngujungka penusah nyadi. Bekal kuasa semina deka diaduka baru pengudah gaya belinsur manah agi.
“Mensia mayuh dilalau ngemeranka tikas pengelikun diri ninting maya kelebih agi maya ujan bangat enggau tikas ai niki kena ngurangka risiko penusah ke enda disadang nyadi,” ku iya ba penerang kilah lemai, ensanus.
Mensia mayuh mega dilalau sebedau penusah ampuh bah nyadi ngambi nutup semua suis kereban elekterik enggau suis besai elekterik ba rumah nyema bisi kelai tikas ai majak niki.
Enti patut tau mindahka perengkaguna elekterik ba atas rumah tauka ba endur ti tinggi nyema tikas ai niki.
Maya ampuh bah, mesti nyeliah diri ari ngena sebarang kereban elekterik sereta anang semak enggau tiang, substeyen tauka tranformer bekal elekterik.
Nyema dalam bot maya ba penusah ampuh bah, jauhka diri ari wayar elekterik.
Pengudah ampuh bah, mensia mayuh mega dikeingat bejejaga maya semak enggau tiang elekterik, ngenyauhka diri ari tiang ti dipelaba agi bisi karan.
Anang sekali nguji ngena kereban elekterik ti udah kena ai bah ti tau ngujungka penusah angus rumah enggau wayar sot sereta minta servis ari tukang elekterik ti bepengelandik sebedau muka suis besai elekterik di rumah.
Ke penerang silik tau betelefon ngagai Servis Penguna SEB 24/7 ba lumur 1300-88-3111 tauka emel ngagai [email protected] minta bantu.
Tau mega nengah aplikasyen SEB Cares ti bisi ba Google Play Store tauka Apple App Store.