SAMARAHAN: Perintah Sarawak enggau Opis Pelajar Nengeri Sarawak dikearapka ulih mantu ngidupka baru kelas komputer ba sekula bantu China.
Sapit Presiden Persatuan Lembaga Pengurusan Sekula Rendah Bantuan Cina, Rodger Chan madahka, kelas komputer ti diketuka nya meri pengerugi ngagai nembiak.
Berebak enggau tu iya beterima kasih ngagai Kepala Menteri Datuk Patinggi Abang Johari Tun Openg apin lama ti madah nyukung pengawa ngidupka barureviving kelas komputer ba sekula bantu China.
“Kelas komputer diketuka ba sekula primari China pengudah lebih dua puluh taun beoperasyen sereta tu ngerugika mayuh nembiak lebih agi nembiak di menua pesisir ke ngembuan akses ti bisi tatak ngagai komputer.
“Komputer ukai agi nyadi subjek ‘extra curricular’ tang nyadi tulang belakang enggau struktur ke tiap subjek. Tu sebagi ari kereban enggau sumber kena belajar ke tiap mata pelajar.
“Aku amat ngarapka Perintah Sarawak enggau Opis Pelajar Nengeri Sarawak ulih mantu ngidupka baru (reviving) kelas komputer ungkup sekula tu,” ku iya dalam jaku pengelalu pengawa bejadi SJK Chung Hua Bako ba Jalai Outer Ring Kuching ditu, kemari.
Pengerami nya kemari dipenyadi Kepala Menteri Datuk Patinggi Abang Johari Tun Openg sereta sama bisi datai Menteri Pelajar, Sains enggau Pansik Teknologi Dato Sri Michael Manyin Jawong, Menteri Kaunsil Kandang Menua enggau Pengawa Berumah Dato Sri Dr Sim Kui Hian, Presiden Persatuan Lembaga Pengurusan Sekula Rendah Bantuan Cina Jonathan Chai enggau sida ke bukai.
Berebak enggau tu Rodger mega minta perintah nengeri nengah Abang Johari ngambika ulih berunding numbuhka Sekula Digital ungkup Sarawak.
Iya madahka maya penyadi pandemik COVID-19 nyadi, nya mayuh udah meri peluang ngagai nembiak ngasaika kelas digital enggau belajar chara digital.
Kelimpah ari isu teknikal enggau mensia ku iya, sekula digital lebih ari semina kelas pintar tauka sekula pintar, tang ngubah serata sekula ari bepelasarka ngena penuh tauka setegan keretas ngagai semua ngena digital baka bank digital.
“‘Sekula Digital’ ulih akses ngagai kelas, pengajar enggau sumber enda ngira maya sereta enda ngira endur ti enda ngira penanggul sosial, ekonomi, pengerai enggau geografi, peluang belajar enda ngira dini alai enggau akses ngagai sumber ti chukup manah.
“Enggau peluang tu, aku minta Kepala Menteri YAB ngambika berunding ngambi numbuhka Sekula Digital ungkup Sarawak,” ku iya.
Bekaul enggau SJK Chung Hua Bako ke baru dipenyadi iya madahka sekula nya dipindah sereta digaga baru ti ngena ungkus belanja RM7 juta sereta belanja dikena ngaga sekula nya diterima ari mayuh bengkah gerempung ukai dikuasa perintah, bala pemesai, bala YB kelimpah ari Perintah Sarawak ti meri RM3 juta.
“Sekula tu manah sereta lain ari ke bukai iya nya sekula keterubah di Sarawak ke bisi kelas pintar ba hari keterubah, sereta ulih nyadi model ti manah ngagai sekula digital jemah ila,” ku iya.