Anda di sini

RM8 juta diberi ngagai Unit Khas Sekula SJKC

 Abang Johari bejadi SJK Chung Hua Bako seraya disempulang (ari kanan) Rodger, Dr Sim enggau Jonathan, kemari. — Gambar Roystein Emmor
BEJADI: Abang Johari bejadi SJK Chung Hua Bako seraya disempulang (ari kanan) Rodger, Dr Sim enggau Jonathan, kemari. — Gambar Roystein Emmor

SAMARAHAN: Perintah Sarawak ngungkupka RM8 juta ngagai Unit Khas Sekolah Rendah Bantuan Cina ba Sarawak.

Kepala Menteri, Datuk Patinggi Abang Johari Tun Openg madahka, unit nya deka dijaga Menteri Kaunsil Kandang Menua enggau Pengawa Berumah Dato Sri Dr Sim Kui Hian.

Iya madahka unit tu deka ngatur enggau matau bantu ke diberi perintah nengeri ngagai Sekolah Jenis Kebangsaan Cina (SJK C).

“Polisi ti dipadahka aku sehari tu (kemari) iya nya perintah kitai besetuju numbuhka unit khas ari baruh Dr Sim enggau kaban komiti entara iya Jonathan Chai (Presiden Persatuan Lembaga Pengurusan Sekolah Rendah Bantuan Cina), senator sereta Kaban Kaunsil ti nguruska bantu ti deka diberi ngagai SJK China.

“Laban utai ke nyadi iya nya kami (perintah nengeri) nerima mayuh peminta bantu tang sida nadai diadu nya kebuah kami ngemutus numbuhka siti unit ari baruh Dr Sim.

“Unit tu deka ngadu sereta matau bantu ke diberi perintah nengeri ngagai SJK C, aku deka betanya ngagai unit tu enggau ari baruh perambu unit kami (perintah nengeri) deka nulung SJK C,” ku iya.

Abang Johari madahka pekara nya ba aum pengarang berita pengudah bejadi SJK Chung Hua Bako ditu, kemari.

Iya madah enggau penumbuh unit tu perintah nengeri ulih ngungkupka belanja tiap taun ngagai unit.

“Dalam timpuh ke sama kitai ulih nganggarka pemayuh belanja ke diberi tiap taun ngagai unit tu sereta sekula sekondari China ti ngena medium baka tu kitai ulih meri bantu enggau konsisten tiap taun ngagai sekula China.

“Lebuh aku besetuju enggau peminta sida ngambika bisi unit nya alai ungkup taun tu kami (perintah nengeri) meri RM8 juta, kelimpah ari nya ungkup sekula sekondari China udah diberi RM9 juta, tu nyadika penyampau semua bantu ke diberi ngagai sekula China bisi RM17 juta.

“Seagi Gabungan Parti Sarawak (GPS) merintah nengeri tu, seagi aku nyadi kepala menteri aku deka bejalaika (mantu),” ku iya.

Iya madahka sekula China ba nengeri tu nerima nembiak pupu bansa sereta ambika banding ari 60,000 iku penyampau semua nembiak ba sekula China urung 20,000 iku iya nya Bumiputera.

Berebak enggau tu, Dr Sim lebuh dikerandau raban pengarang berita madah batang tuju unit nya ditumbuhka awakka ulih ngaga baru bilik kelas enggau mindahka baru sekula.

Ku Dr Sim, tu nunjukka pemesai perintah GPS beratika peminta bantu sekula primari taja pan sekula primari dipelanja perintah besai ti lebih ngagai mayar pengajar enggau mantu ngemanahka agi.

“Aku deka meri terima kasih ngagai kepala menteri, tu siti agi inisiatif perintah GPS, ti keterubah baka tu di Malaysia.

“Ngarapka nengah unit tu kitai ulih berati sereta ngemeratka bagi sekula ti begunaka bantu lengkas baka begunan ke deka runtuh, sekula ke patut dipindah.

“Nya alai bantu belanja tu (unit) jauh bida ari belanja perintah besai ti semina kena ngemanahka baru tang ukai kena ngaga blok sekula baru enggau ukai kena mindahka sekula,” ku Dr Sim.

Sama bisi datai ba pengerami nya kemari, Menteri Pelajar, Sains enggau Pansik Teknologi Dato Sri Michael Manyin Jawong, Menteri Perengka Pengangkut Datuk Lee kim Shin, raban menteri muda, Kaban Parlimen Kota Samarahan Rubiah Wang, Presiden Persatuan Lembaga Pengurusan Sekolah Rendah Bantuan Cina Jonathan Chai enggau sapit iya Rodger Chan sereta sida ke bukai.

Advertisement