Anda di sini

PKS diperansang enggau ba platform e-Dagang kena ngelakuka produk

 Abdul Latiff (kanan) begulai enggau Dr Abdul Rahman (tengah) enggau Dr Hazland maya ba aum media pengudah penemuai iya, kemari.
AUM MEDIA: Abdul Latiff (kanan) begulai enggau Dr Abdul Rahman (tengah) enggau Dr Hazland maya ba aum media pengudah penemuai iya, kemari.

KUCHING: Mayuh agi orang dagang tauka Pedagang Mit enggau Jelan Pemesai (PKS) di Sarawak diperansang enggau ba platform pengawa dagang digital baka [email protected] kena ngerichahka agi pengawa ngelakuka produk nengah ‘online’.

Menteri Pemansang Menua Pesisir Datuk Dr Abdul Latiff Ahmad madah, nengah DesaMall nya ulih meri peluang produk orang dagang dijual nengah sekeda platform e-Dagang ti tebilang baka Lazada enggau Shopee.

“Pengudah produk sida tama ke DesaMall, tu udah nyadi dagang dunya semina di Sarawak ari sukut logistik baka ni kitai deka nganjung barang ari Sarawak ngagai destinasyen pemeli.

“Ambika chunto, ba penemuai aku begulai enggau dua iku orang dagang sehari tu (kemari), kami beratika sida nadai penanggul ari sukut produk laban tu endang manah enggau udah datai ba dagang luar baka Jepun, ti bereti nyapai standard entarabansa.

“Semina bakani sida deka ngerembaika agi produk ngambika bulih asil barang ke dijual bisi untung laban produk ti manah aja nadai bantu iklan tauka platform nyual nya tentu enda ulih bejalai,” ku iya.

Iya madah munyi nya ba aum media pengudah ngabas premis kilang kosmetik bepelasarka Madu Kelulut, iya nya Sophia Taha Holding Sdn Bhd ba Taman Perindustrian Demak Laut enggau premis proses Lenispice Sdn Bhd di Jalai Kampung Bako ditu, kemari.

Ku Abdul Latiff, ambika chunto kompeni Lenispice ti ulih nyual nyentuk 400 ngagai 500 unit produk setaun tang nya semina ungkup dagang ba Sarawak aja.

Ku iya, nyema sida ulih ngangkatka agi strategi bedagang, kompeni nya ulih rembus dagang ba serata Malaysia.

“Nyema sida nyereta DesaMall, reti nya sida udah ulih nyingkang jauh agi iya nya dalam dagang dunya enggau DesaMall tu sempama baka palan bebelika barang nengah online,” ku iya.

Kelimpah ari nya, Abdul Latiff mega meransang orang dagang genturung pendiau kelebih agi ngerebut peluang ke bisi ngelakuka produk sida nengah rentayan Kedai Mesra Petronas.

Ku iya kena bulan Jun nyin tadi, Opis Menteri nengah Mara udah nyain Sempekat Pemereti Ati (MoU) begulai enggau Petronas Dagang dikena mantu orang dagang ngelakuka produk sida ke Kedai Mesra Petronas.

“Nengah inisiatif tu, produk orang dagang genturung pendiau ti bisi penetap ulih rembus ba dagang ti betul enggau kami bisi urung 750 rentayan Kedai Mesra Petronas ba serata menua,” ku ya nyemetak.

Pia mega ku Abdul Latiff, tu ulih mantu orang dagang ke alai produk sida engka ke enda ulih tama ke premis baka 7Eleven, KK Mart tauka Tesco ketegal napi penanggul tauka pemar.

Sama bisi datai nyempulang penemuai iya nya Menteri Muda Betanam Betupi, Tanah Adat enggau Pemansang Kandang Menua Datuk Dr Abdul Rahman Ismail enggau Kaban Kunsil Nengeri Demak Laut, Dr Hazland Abang Hipni.

Advertisement