SIBU: Opis Menteri Komunikasyen enggau Multimedia Malaysia (KKMM) majak chakah bejalaika Kimpin Ngemeranka Norma Baru kena ngenegapka agi pengawa ngelaban sereta mutuska rentayan penyakit COVID-19.
Ketuai Sekretari KKMM Dato Suriani Ahmad madah, opis menteri nengah Opis Pemadah Malaysia (JaPen) merambu deka ngatur 459 program di serata menua tu.
Ku iya, KKMM merambu deka ngatur ambis kurang tiga bengkah program dalam siti pelilih menua.
“Pelaba kami, penyampau 153 pelilih menua (palan bejalaika program) di serata menua.
“Program tu berengkah ari sehari tu (15 September) sereta deka tembu nyentuk 31 Disember 2020. Berengkah ari hari bulan nya, kami deka semak sereta begulai enggau komuniti.
“Enti bisi pematut, kami deka neruska program tu,” ku iya lebuh dikerandau pengarang berita pengudah ngulu Program Ngemeranka Norma Baru: Mutuska Rentayan Covid-19 ba Rumah(Rh) Akat Akong di Tanjung Penasu ditu, kemari.
Nitih ku Suriani, Rh Akat iya nya palan keterubah alai ngatur program nya pengudah dipenyadika Menteri Besai Tan Sri Muhyiddin Yassin ba Kompleks Sukan Pagoh, Johor kena 8 Mac, empai lama.
Ku iya nambah, KKMM deka besaup enggau ejensi perintah ke bukai nyengkaum Polis Diraja Malaysia (PDRM) enggau Opis Menteri Pengerai Malaysia (KKM) kena bejalaika program enggau licha ngambika ulih nyungkak pemereti ati komuniti ba sesebengkah menua nya.
“Tu kena nyungkak pemereti ati dalam komuniti sesebengkah menua nya kelimpah nentuka sida seruran nitihka prosedur operasyen standard (SOP) ti udah ditetapka perintah,” ku Suriani.
Sama bisi iya nya Sekretari Politik Kepala Menteri, Christopher Rome Tegong enggau sekeda bala ke bukai.