KUCHING: Sarawak dipelaba ngerikodka penyampau bini Ketuai Ruang Bilik (KIR) enggau Ketuai Ruang Bilik Indu (KIRW) ngerejista dalam e-kasih di Sarawak mayar i-SURI ti pemadu mayuh, enti perintah nengeri ngemendarka melanja bayar sepenyampau RM18.3 juta ungkup tuju nya.
Menteri Pengintu Pengelantang Komuniti, Orang Indu, Ruang Bilik enggau Pemansang Nembiak Mit Dato Fatimah Abdullah madahka keretas perambu bantu perintah nengeri melanja bayar i-SURI khas ungkup bini KIR enggau KIRW ti berejista enggau e-kasih udah dikenatai ngagai kabinet nengeri Sarawak ngambi diperundingka.
“Perambu bantu perintah nengeri dikena melanja i-SURI khas ungkup bini KIR enggau KIRW di Sarawak ti berejista ba baruh e-kasih bayar minimum RM5 ninting bulan tauka RM60 setaun ngambika sida ulih ngasaika pemaik insentif RM480 setaun ari perintah besai ti dipasuk terus ngagai akuan KWSP sida.
“Ba tuju nya kami udah nyendiaka kertas kabinet minta bantu RM18.4 juta ari perintah nengeri dikena mantu bini KIR enggau KIRW ti seranta dalam mayar i-SURI,” ku iya.
Iya madah munyi nya lebuh bejaku ba Pengerami Nangguhka Licha Bekaul i-SURI, i-SARAAN, Bantu Khas Indai Tunggal (BKIT) enggau i-Sarawak Care di sebuah hotel ditu kemari.
Fatimah madahka naka 31 Ogos 2020, 11,217 ari 28,748 ti ngerejista enggau i-SURI udah mayar.
“Penyampau bini KIR enggau KIRW ke seranta di Sarawak udah bayar i-SURI. Nya penyampau pemadu mayuh dibanding enggau nengeri bukai di Malaysia tang Sarawak mega ngerikodka penyampau raban dalam e-kasih tinggi iya nya 66,016 ti bepenatai pemisi sida baruh garis seranta RM1,020 sebulan.
“Nya alai, kami ngarap pekara ti dibantai kami dalam kabinet nengeri ulih dikemendar.Reti nya sistem sukung ungkup rayat seranta kelebih agi orang indu iya nya raban tu bisi duit taruh enggau perengkaguna ke meri pemaik baka kaban bukai ba sukut pelajar anak, rumah enggau ke bukai,” ku iya nerang.
Sentang i-SARAAN Fatimah madahka nya entara skim duit taruh ti meri pemaik ngagai mayuh agi raban ti kurang bepenatai pemisi nyengkaum bala indai.
“Kami endang meransang kelebih agi bala indai tin nadai gawa nyereta skim duit taruh tu laban mayuh meri penguntung baka insentif khas 15 peratus ti ditetapka ngagai penyampau maksimum bayar RM250 setaun.
“Sida ke mayar ulih ngeluarka duit nitihka penetap ti udah ditetapka baka bantu duit RM2500 tang bepanggai ngagai atur enggau penetap, dividen ninting taun sereta ba sukut chukai,” ku iya nerang.
Berebak enggau nya, iya ngarap KWKPK ulih ngenataika perambu i-SARAAN ngagai perintah nengeri ngambi diperundingka kena neruska pengawa ke pengelantang raban ti kurang penatai pemisi nyadi duit taruh ba hari tuai jemah ila.
Sama bisi datai Sekretari Mendam KWKPK Dr Sa’adiah Abdul Samat Ketuai Nengeri KWSP Sarawak Halim Boweng, Pemangku Direktor Opis Pengintu Pengelantang Raban Bansa Sarawak Mohd Guntor Rajaee sereta pengari gerempung ukai dikuasa perintah (NGO).