KUCHING: Sekretari Besai Gabungan Parti Sarawak (GPS), Datuk Alexander Nanta Linggi nyemetak madahka nadai penyalah enti Gabungan Parti Sarawak (GPS) mantu Perikatan Nasional (PN) napi pengawa bepilih nengeri Sabah sekali tu.
Ku iya, kebuah pia laban GPS enggau PN sama dalam siti perintah besai.
“Aku nadai meda sebarang penyalah enti GPS deka mantu PN,” ku iya lebuh nyaut tanya sekalika GPS deka mantu kaban sida PN ba pengawa bepilih nengeri Sabah ti deka diatur kena 26 September.
Iya madah munyi nya ba aum media pengudah Program Dialog Opis Menteri Dagang Dalam Nengeri enggau Pekara Penguna (KPDNHEP) begulai enggau Federasyen Serakup China Sarawak (SFCA) enggau Balai Dagang enggau Industri China Sarawak (ACCCIS) di City Square ditu, kemari.
Taja pia Alexander madah, pemutus sekalika GPS deka mantu, nya mesti ditanya dulu ngagai ketuai tetinggi gempung parti nya dulu.
“Diatu, kami bedau ngaga pemutus tauka baumka pekara nya,” ku iya.
Menteri Dagang Dalam Nengeri enggau Pekara Penguna (KPDNHEP) nya madahka GPS bisi ati meda baka ni pengawa bepilih nengeri Sabah nya diatur.
“Kami bisi ati meda baka ni pekara tu deka diatur. Baka orang bukai, kami berasai nyelai laban mayuh amat chalun ke bediri minta pilih.
“Engka nya setipak enggau utai ke nyadi din. Aku semina meda nya siti proses normal ke alai nya bisi peminta ngambika nyadi baka nya,” ku iya.
Tambah iya, Sabah enggau Sarawaknadai kala sebaka ari sukut chara pengawa bepilih ti dipejalaika ngelama tu.
“Sentimen iya engka kededua nengeri tu samadi Malaysia Timur, tang ba senario politik, kededua nengeri bebida,” ku iya.