KUCHING: Menteri Dagang Temuai, Seni enggau Main Asal, Datuk Abdul Karim Rahman Hamzah nyemetak tim ngatur aum nya enda ibuh baum berandau pekara sentang minyak enggau gis.
Ku iya, tu laban pekara nya seriris enggau pengarap bekunsi dalam Konstitusyen Malaysia.
Abdul Karim, ti nyadi ketuai tim baum ti dichiri kena 10 Jun ari Komiti Aum Sempekat Malaysia 1963 (MA63) madah, kaul ti manah entara Sarawak enggau perintah besai Perikatan Nasional maya tu udah ngasilka mayuh pemutus ti positif nyengkaum Petronas mayar chukai nyual enggau servis produk petroleum ke Sarawak.
Nya alai, ku iya, tu pemadu manah ngagai raban eksekutif renggat nengeri enggau konstitusyen ngatur randau ari nyerahka pekara nya ngagai pengubah undang-undang ti timpuh servis sida deka abis pengudah pengawa bepilih nengeri ke diatur dalam timpuh dua tauka tiga bulan agi.
“Perintah nyengkaum ari tiga institusyen iya nya eksekutif, legislatif enggau akim. Ukai semina institusyen undang-undang nyadi orang tengah, raban ti ngatur perintah sekalika ba renggat nengeri tauka konstitusyen iya nya eksekutif nyadi orang ke nentuka pemutus.
“Tang ukai aku madah kitai nulak ke tisi senentang pekara ba undang-undang. Nama utai ti dipeda aku Kaban Kunsil Nengeri (ADUN) Batu Lintang, See Chee How tauka ADUN Bukit Assek Irene Chang, nama utai dipeda sida institusyen undang-undang patut ngambi baru pekara nya.
“Tang institusyen undang-undang bisi timpuh entara dua ngagai tiga bulan enggau lebuh ngubah undang-undang pengudah Kunsil Nengeri (DUN) dirak. Nama ti deka nyadi ngagai Komiti Undang-Undang?
“Nya kebuah udah bisi aum ti benung nuju ngagai singkang ti betul ari institusyen eksekutif, tu nyengkaum institusyen undang-undang, nama kebuah enda ngelakka aja nya ngagai tuju ke betul enggau kami ulih bulih utai ti kedekaka kami,” ku iya madah ngagai pengarang berita pengudah ngabas seraya kereja ke Kampung Terbat Mawang ditu ensanus.
Irena empai lama tu udah mantah penerang Abdul Karim iya nya raban tim ngatur aum betemu lalu berunding iya nya enda patut, tang madahka Abdul Karim patut ngulu penuh dalam proses aum penuh nya dipejalaika.
Iya mega ngingatka Abdul Karim iya nya bisi ke dipesetuju sentang ke dipelaba ari semua kaban dalam Komiti Aum nitihka tetiap intipati aum nengah penyereta enggau regas ngaul diri dalam semua parti ti mungkur.
Kena 14 Julai empai lama, See udah nyuaka surat ningkilka diri nyadi kaban komiti aum MA63 enggau madahka pemutus iya nya berindik ari kurang pengelurus dalam pekara aum begulai enggau Petronas enggau perintah besai mutarka chukai nyual ti diutang ngagai Sarawak.
Abdul Karim lebuh nerang enggau silik kaul ti manah entara perintah besai-nengeri ti ngujungka bulih pemutus positif dalam aum entara Sarawak enggau Petronas ti bechairmanka Menteri Kereja Raya, Datuk Seri Fadillah Yusof begulai enggau Menteri Wang Datuk Seri Tengku Zafrul Tengku Abdul Aziz.
“Udah tentu kitai nadai disekat ngenataika pekara ti bedau nyadi kena nambah peminta ti bedau dikeamatka.
“Tang enggau belelubah, aku madahka hak minyak enggau gis enggau belinsur deka pulai baru ngagai kitai,” ku iya.
Berebak enggau nya, Abdul Karim ba Terbat Mawang ngabas projek tagang (pengawa berikan enggau ditagang) enggau mendingka langgur penemu ngangkatmanah palan nya nyadi taman eko-dagang temuai.
Sama bisi datai ADUN Kedup Martin Ben, Residen Serian Tuah Suni enggau pemesai ari Opis Betanam Betupi Sarawak enggau sebuah kompeni arkitek ti ngatur langgur penemu nya.