Anda di sini

Tentuka penyakal enda ngeruga projek pemansang ke pengelantang rayat

Advertisement
 Uggah benung berandau enggau Tuai Rumah Benard (kiba) Ronald sereta Petrus.
BERANDAU: Uggah benung berandau enggau Tuai Rumah Benard (kiba) Ronald sereta Petrus.

KUCHING: Projek Bebuling STOLport (padang bilun jalai pandak) di Spaoh ke beungkus RM108 juta berisiko ulih dikinsil enti penyakal megai perintah nengeri tu.

Sapit Kepala Menteri, Datuk Amar Douglas Uggah Embas ba penerang iya kemari madahka chalun parti penyakal bisi ati deka bediri minta pilih di kerusi Bukit Saban udah bejaku sentang pekara nya dalam licha iya ba sekeda rumah panjai ditu.

“Tu entara sekeda chunto baka ni parti penyakal ngereja pengawa ti dikedeka sida. Projek pemansang ke beguna kena sida nyadika agenda numbangka perintah enggau pengari rayat ti dichiri.

“Sida kebendar, ngemuntanka juluk enggau guna rayat ti deka mansang ke mua,” ku iya lebuh bejadika Program Jangkauan Komuniti (AgriCOP) Opis Betanam Betupi di Rumah (Rh) Benard Engkerbai, Anyut ditu kemari.

AgriCOP, diatu dipejalai di selampur nengeri dikena ngerapitka kaul enggau raban orang betanam betupi di menua pesisir enggau Opis Betanam Betupi.

Ku Uggah madah, Bebuling STOLport ngembuan tanggungpengawa nyadi fasiliti perengka pengangkut nganjung produk utai tanam ngagai pasar dalam timpuh ti pandak kena nyamin utai tanam nya agi baru.

Projek nya udah dikemendar Kepala Menteri Datuk Patinggi Abang Johari Tun Openg perais pemadu manah ungkup kitai ba ditu, ku iya.

“Tu tambah diguna enti Betong nyadi sebagi ari Agropolitan Sadok enggau palan Bakul Pemakai Betong/Mukah.

“Tu entara program betanam betupi skala besai enggau moden dikena mantu ngenegapka agi objektif Sarawak nyadi pengeluar pemakai enggau produk pemakai sereta nengeri pengeksport manggai ba taun 2030.

“Ba awak ke sama, meri peluang ngagai mensia mayuh ngangkatka tikas pengidup sida,” ku iya nambah.

Ku Uggah baru, Bebuling STOLport entara sekeda projek ke besai guna ti dipejalaika ba kandang menua pesisir ti nyadi tagit penyakal ke dekaka kuasa ba kandang endur nya.

“Tu meri empas ngagai pengelantang enggau pemansang sereta raban penyakal semina ulih dipeda enti lebuh pengawa bepilih nengeri nyau majak semak aja.

“Sida datai ngiga enggau nyadung jaku bula lalu udah nya lenyau pengudah jaku petenah sida enda mujur,” ku iya.

Ku Uggah, pengari perintah Gabungan Parti Sarawak (GPS) seruran bejalaika pengawa sida belama laban besedia deka meri servis baka ke udah disemaya kami enggau tu ukai semina retorik aja.

Iya mega ngelalau rayat ke alai perintah udah ngatur mayuh macham program pengawa pemansang betanam betupi ari baruh Duit Turu Fasilitasi Betanam Betupi beungkus RM265 juta.

“Kami deka numbuhka pengawa betanam betupi moden, teknologi baru kena nyadika sektor betanam betupi nyadi sebuah pengawa ti meri penguntung.

“Kami deka numbuhka  mayuh agi taman Agro nyadi palan ngumpul, proses enggau mungkus CPPC kena ngenegapka agi kaul raban ke ditagit,” ku iya nerang.

Uggah mega udah ngemendarka geran sepenyampau RM130,000 kena ngaga padang futsal rumah panjai nya nyengkaum ngungkupka RM10,000 ngagai Komiti Pemansang enggau Pengelikun Genturung Pendiau (JKKK) ngatur aktiviti ti bekaul enggau komuniti.

Sebedau tu, Pemesai Opis Betanam Betupi Bagi Menua Betong, Petrus Kang madahka 86 pesereta udah ngambi bagi dalam pengawa nanam sawit, lada chelum enggau licha bekaul betanam betupi moden AgriCOP ke diatur di Spaoh dalam timpuh ke semak tu.

Sama bisi datai iya nya Direktor Opis Betanam Betupi Nengeri, Ronald Ripid, Sekretari Politik Kepala Menteri, Dr Richard Rapu enggau Residen Bagi Menua Betong, Friday Belik.

Advertisement