TATAU: Projek pemansang ti dipejalaika perintah Gabungan Parti Sarawak (GPS) ungkup peranak ba menua pesisir ngayanka perintah ngemeratka guna peranak ba kandang menua nya.
Menteri Muda ba Opis Kepala Menteri (Undang-Undang enggau Adat Bumiputera) ke mega Kaban Kunsil Nengeri (ADUN) Kakus Datuk John Sikie Tayai madah, entara projek iya nya nyendiaka bekal elekterik 24 jam ngagai peranak kandang menua pesisir sebaka enggau ba mengeri.
Ku iya, ungkup Tatau projek nyendiaka Bekal Elekterik Menua Pesisir Sarawak (RES) beungkus RM14.3 juta deka meri pemaik ngagai peranak ari sitak Rumah Ado, Lubok Kubong nyentuk ke Rumah Achun, Nanga Kelebu Tatau.
“Projek nya ti bisi lima kluster nyengkaum nyendiaka bekal elekterik ba sitak Jalai Samarakan, Jalai Sangan nuju ke Rumah Pandong, Rumah Enjan, Rumah Wilshatkon Blue, Rumah Gundi enggau rumah panjang ke bukai ke besemak enggau jalai Sangan ti empai bulih bungkur bekal elekterik,” ku iya.
Iya madah munyi nya ba ‘Sesi Libat Urus’ Begulai enggau Ketuai Bansa enggau Ketuai Raban Bansa Sitak Jalai Kelebu/Rumah Ado bejalaika Projek Bekal Elekterik Menua Pesisir Sarawak (RES) ba Dewan Komuniti Punan, Lubok Kubong Tatau, kemari.
Nya alai, John Sikie ngarap ngambika peranak meri kerejasama ngagai projek ti dipejalaika kena nentuka pengelanchar enggau ulih tembu ba timpuh ti ditetapka.
Nitih ku iya, perintah mega udah ngemendarka agih belanja ungkup taun tu beungkus RM18 juta kena nyambung Projek Skim Bekal Elekterik Alternatif Menua Pesisir Sarawak (SARES) ba sitak Nanga Tau nyentuk ke Takan, Ulu Anap.
“Tu ngaul 21 buah rumah panjai ari sitak nya enggau ba taun nyin tadi bisi 18 buah rumah panjai ari sitak Kakus udah ngasaika elekterik 24 jam nengah perengkaguna SARES,” ku iya nerang.
Nangkanka nya ba sitak ke bukai ku iya, ba baruh DUN Kakus udah dikemendarka nyambung RES ungkup empat rumah panjai di Sungai Tau Selangau enggau enam buah rumah panjai ba sitak Ulu Bawan, Mukah.
Ku iya, perintah GPS ba baruh pegai Kepala Menteri Datuk Patinggi Abang Johari Tun Openg seruran ngemeratka pengelantang pendiau peranak nengah juluk ngangkatka perengkaguna pemun ungkup peranak menua pesisir.
“Mayuh projek udah dikemendarka perintah baka nyendiaka Projek Bekal Ai Alternatif Sarawak (SAWAS) ungkup sitak Rumah Ado, Rumah Jeffery Kitup, Rumah Kiah enggau Rumah Jayan nengah agih belanja udah dikemendarka beungkus RM15 juta,” ku iya nambah.
Ku iya, ungkup projek ngangkatmanah jalai ari Nanga Kelebu ke Rumah Ado mega benung dalam pengawa begaga sereta dipelaba tembu ba bulan Januari 2021.
Ba awak ke sama, John Sikie ngelalau peranak ngambika enda nyambung kediri empu tali karan ba rumah ke alai nya mesti digaga ari kunterik ke dichiri Sarawak Energy Bhd (SEB) kena nyeliah penusah angus.
Sama bisi datai ba program nya, Pemesai Pengereja Pengawa Opis Pelilih Menua Tatau Winnie Dian, Pemancha Gerosen Jubin, pengari ari Opis Menteri Utiliti Sarawak Awang Heriwan Awang Afindi, pengari SEB Ferrera Paris, Penghulu Sanok Magai enggau Penghulu Lubun Kinchang.