KUCHING: Sempekat Malaysia 1963 (MA63) entara tiga isu besai di Sarawak ti ditegika Parti Sarawak Bersatu (PSB) dalam manifesto Pengawa Bepilih Nengeri (PRN) ti deka datai.
Presiden Parti Sarawak Bersatu (PSB) Dato Sri Wong Soon Koh madahka dua agi isu besai ti ditegika parti iya nya Akta Pemansang Petroleum 1974 (PDA74) enggau Tanah Adat Bansa Asal (NCR).
“Aku udah ngaga sekeda pansik bekaul enggau isu besai ti ditapi Sarawak ungkup manifesto Pengawa Bepilih Nengeri (PRN) PSB ti deka datai.
“Aku deka nyerahka ngagai tiga iku pengelicha ti bepelajar kena nerangka senentang tiga isu besai ti ditapi kitai tu,” ku iya.
Iya madah munyi nya lebuh bejaku bejadika Seminar Pemereti Ati MA63, PDA74 enggau tanah NCR di Happy Dinner, Crown Square ditu, kemari.
Sama bisi datai iya nya Sekretari Besai PSB George Lo, ketuai raban nembiak PSB Dr Johnical Rayong, bala ketuai enggau raban PSB ke bukai.
Pengelicha seminar nya nyengkaum ari Kaban Kunsil Nengeri (ADUN) Batu Lintang See Chee How (MA63), Presiden Gerempung Patriot Sarawak (SPA) Datuk John Lau (PDA74) enggau aktivis tanah NCR Nicholas Bawin.
Ba jaku iya, Wong ke mega ADUN Bawang Assan ngansak perintah nengeri ngaga mayuh agi pansik sebedau berunding enggau perintah besai bekaul enggau hak minyak enggau gis nyengkaum MA63.
Ku Wong nerang, semua hak enggau ke guna Sarawak ti tekeruga sereta diambi perintah besai sebedau tu patut ditegika enggau penerang ke dituku enggau penerang ke endang nyaga hak nengeri.
“PSB iya nya sebuah parti ti bediri tegap sentang sebarang bagi pekara ke udah ditetapka dalam MA63.
“Kami (PSB) bediri tegap enggau semua pekara dalam MA63 nyengkaum sempekat 18 pekara ungkup nengeri Sarawak,” ku iya.
Senentang PDA74, ku Wong madahka iya kala nanya perintah nengeri bekaul enggau sekeda isu ti ngaul akta nya.
Ku iya, tanya nya enda disaut perintah nengeri tang ditangkan enggau ngenataika saman ngagai iya ba kort.
“Aku deka saut ba tanya ti dikenataika aku tang perintah nengeri mutuska deka nyaman aku. nyadi, aku deka betemu enggau sida ba kort enggau mutarka pekara nya,” ku iya.
Kelimpah MA63 enggau PDA74, PSB ku Wong nyemetak mega ngemeratka isu bekaul enggau tanah NCR enggau Kanun Tanah Sarawak.
Nyema patut ku iya, PSB deka mansik baru Kanun Tanah Sarawak kena ngenukuka hak adat bansa asal ba tanah sida enggau mutarka isu Pemakai Menua enggau Pulau Galau.
Ba seminar nya, Wong mega mai rayat Sarawak meri sukung penuh ngagai PSB ba Pengawa Bepilih Nengeri (PRN) ti deka datai.
Nyadi sebuah parti ti ngatika diri lalu enda besangkut paut enggau sebarang bagi gempung, PSB ku iya siti platform ke manah mai ubah ngagai rayat enggau nengeri tu.