MIRI: Kebuah kebendar pengamah sungai di Miri iya nya ari darat ti bepun ari palan rumah enggau palan industri, ku Menteri Perengka Pengangkut, Datuk Lee Kim Shin.
Iya ke mega Kaban Kunsil Nengeri (ADUN) Senadin madah, uras ke dibuai ngagai parit, anyut ke sungai nya kebuah pantai kamah.
Lee madah, entara pantai ti kamah ketegal pengawa tu iya nya pantai Marina.
Mayuh pengawa beripai diatur di pantai nya tang mengkang bedau ulih mutarka isu nya.
“Baka ni uras tau bisi ba pantai. Nama bisi orang muai uras ba pantai? Nadai. Tu ari palan berumah kitai, industri kitai. Kitai enti kitai muai uras ba parit, lebuh hari ujan, ai parit nya ti mai uras ngagai sungai lalu ngujungka datai ba pantai. Tu mih kebuah nya,” ku iya nerang.
Ku Lee, kebuah sungai kamah iya nya ari pengawa muai uras enggau minyak ari kapal enggau bot.
Ku Lee nerangka pekara nya lebuh bejaku bejadika kimpin pemereti ati mensia mayuh sentang pemeresi enggau pengelikun sungai di kampung Pujut Tanjung Batu, kemari.
Berebak enggau nya, kerejasama ari semua beguna amat kena nyaga pemeresi sungai enggau enda nyadika sungai nya baka tong uras.
Entara pemesai guna sungai iya nya nyadi pemansut bekal ai ungkup ke guna pengawa besesehari baka ari Sungai Liku enggau Sungai Ulu Baram sereta nyadi pemansut jereki, pemakai enggau ke guna sistem perengka pengangkut sungai.
“Nya alai, kami ngatur mayuh macham program dikena meri penerang, meri pelajar ngagai peranak, ngagai nembiak mit nengah pekit nyura ngambika sida nemu sentang reti nyaga sungai enggau deka nyadika sungai nya selamat,” ku iya nerang.
Pengawa meresi sungai Miri mengkang dipajakka taja enda agi dirintai dalam sepuluh sungai ti pemadu kamah di nengeri tu.
Iya deka peranak Miri temegah ati enggau tikas pemeresi sungai Miri ti beguna amat ke nama Miri nyadi mengeri palan ngelantangka ati sereta palan besai dagang temuai di utara Sarawak.
Kerejasama ari Kaunsil Mengeri Miri (MBM) beguna amat dalam nentuka orang dagang enggau peranak ngatur uras enggau manah.
“Beri mih tong uras ke chukup di genturung pendiau nyengkaum tong uras besai ngambika peranak ulih ngatur uras enggau manah. Tu mih singkang ke patut diambi.”
Ari sukut neritka adat enggau undang-undang, atur ke terit patut ditinggang ngagai pesalah ti muai uras ke dalam sungai.
Kaunsil nya meda bisi ngemataka pengawa nyuaka tong uras ungkup masjid enggau dewan genturung pendiau.
Bisi 734.5 kg uras udah mujur digumpul peranak dalam pekit ngumpul uras maya pengawa beripai ke diatur maya pagi nya.
Program dipunka enggau senamrobik pukul 7 pagi. Bisi mega diatur iya nya licha ari Opis Sungai Sarawak (LSSS), Opis Pengerai Bagi Menua Miri enggau MBM sereta pekit nyura nembiak mit.
Program ke sama tu mega udah diatur di Batu Satu Kuala Baram enggau ditampung ba genturung pendiau kelebih agi ke besemak enggau sungai.
Sama bisi datai Chairman LSSS Dr Murni Suhaili enggau Ketuai Genturung Pendiau Usman Suleiman.