SIBU: Tamu Sentral Sibu deka nyadi makit keterubah ba ditu enda ngena mata duit tang nengah aplikasyen Sarawak Pay, ku Chairman Komiti Mendam Orang Dagang Mit Pasar Sentral (SMC), Kunsilor Albert Tiang.
Ku iya, urung 70 peratus ari 1,100 pedaja ba pasar sentral tu udah ngerejista diri ngena aplikasyen Sarawak Pay, ke pemaik enggau perengkaguna raban penguna.
“Kepala Menteri Datuk Patinggi Abang Johari Tun Openg deka bejadika transaksyen enda ngena mata duit nengah servis Sarawak Pay enggau Wifi enda bebayar ba Tamu Sentral Sibu kena 16 September tu ila,” ku iya madah ngagai pengarang berita empai lama lalu nambahka tu program Kaunsil Multimedia Sarawak enggau projek SMC.
Senentang Wifi enda bebayar, ku Tiang, tu dipelanja Sarawak Information Systems Sdn Bhd (Sains) enggau tuju besai iya nya kena nyukung aplikasyen Sarawak Pay.
Ku iya nambah, program tu ila diatur sereta bepalan ba Pintu 2 Tamu Sentral nya.
Nitih ku Tiang, urung 40 iku temuai udah dikangau ngambika datai enggau ngulu program nya lalu nitihka prosedur operasyen standard (SOP) ti udah ditetapka.
Pengudah program tu ku iya, Kepala Menteri deka makai tengah hari begulai enggau mensia mayuh ba ringkat satu pasar sentral nya nya ila.
Ungkup rikod, Tamu Sentral Sibu iya nya siti ari endur ti dikerindu bala temuai di Sibu.
Pasar tu digaga kena taun 1996 sereta mungkur lebih ari 1,000 raban dagang ba endur nya.