PAKAN: Kaban Kunsil Nengeri Pakan, Tan Sri William Mawan Ikom pechaya mayuh agi aktiviti ti deka meri pemaik ngagai bala nembiak sekula deka diatur nengah pemisi Dewan Tebuka Sekula Primari Nanga Pakan ditu.
Ku iya, perengkaguna pelajar baka dewan nya endang ke dikena sama, ulih nyendiaka peluang ngagai sekula ngatur mayuh bengkah aktiviti ke besai baka seminar, licha, program akademik enggau peransang begulai enggau sekeda sekula di Pakan.
“Ke bendar pengawa tu deka nyadi platform ke beguna amat kena ngerapitka kaul sereta kerejasama ke lebih manah ba sekeda sekula di Pelilih Julau
“Dewan tu mega dikearap ulih meri pengagit ngagai bala pengajar ngambika majak chakah gawa enggau penuh komitmen nyapai juluk ati enggau agenda pelajar menua,” ku iya lebuh ke bejaku bejadi dewan nya, kena Hari Empat tu tadi.
Sama bisi ngulu pengerami nya, Kepala Pengajar SK Nanga Pakan Benedine Patric Unyat.
Dewan nya digaga ngena duit ari Program Transformasyen Menua Pesisir (RTP) Mawan ke beungkus RM250,000 ku iya, endang setipak enggau juluk ati perintah ngajar bala nembiak sekula bemacham penemu, ngambika nyadi modal mensia ke beguna ngagai menua enti sida udah besai jemah ila.
Iya pechaya, perintah semampai beratka agenda pemansang perengkaguna nembiak sekula enggau pelajar ngambika bala nembiak sekula ulih ngena perengkaguna ke meruan.
“Pelajar diatu udah berubah lalu nyata dipeda ari guna asal. Bala nembiak ti nurun besekula ukai semina belajar tang mega diajar nyadi aris menua ngambika nyadi modal mensia ti pandai serea ngembuan ulah ke manah,” ku iya.
Iya mega berasai temegah ati meda pengeran apai inda ti amat beratka pelajar anak sida, laban sida nemua pelajar nya senyata ke pemadu beguna kena ba jeman teknologi enggau pemansang.
“Nelson Mandela kala madah, ‘Education is the most powerful weapon which you can use to change the world’, nya alai kena nentuka pemujur proses pelajar, apai indai patut majak bekerejasama enggau sekula nengah PIBG,” ku iya.