BETONG: Bisi 14 rumah jalai pengarap enggau Gempung jalai pengarap dalam sitak Kunsil Nengeri Layar udah nerima bantu ari Peintah Sarawak nengah Unit Pekara Jalai Pengarap Bukai (UNIFOR).
Gerija Sidang Injil Borneo (SIB) Adonai Betong sama bisi nerima bantu sepenyampau RM50,000 ti disuaka Kaban Parlimen Betong Datuk Robert Lawson Chuat enggau ADUN Layar Gerald Rentap Jabu ba sebengkah pengerami mit ti diatur ensanus.
Chairman Komiti Pemansang Gerija SIB Adonai Betong, Henry Jugah ke sama bisi ngulu pengawa nya berasai gaga amat ati enggau bantu ke diberi nya.
“Terima kasih ngagai Perintah Sarawak ti udah ngemeranka chara inklusif ngagai rayat Sarawak ke mayuh jalai pengarap kena nyaup semua nengah bantu ke diberi nya kena ngaduka pengawa ba gerija diri empu.
“Kami mega meri terima kasih ngagai Sapit Kepala Menteri Datuk Amar Douglas Uggah Embas enggau Rentap ti udah bebendar mantu kami nengah bemacham chara nyengkaum ngemendarka bantu belanja ngagai gerija kami.
“Nengah bantu ke diberi nya, kami ulih ngemanahka rumah jalai pengarap kami.
“Tu nyengkaum nyeruri enggau meli perengka muzik gerija ngambika bisi dikena kami semua,” ku iya lebuh ke ngenang pasal pengawa nyuaka chek UNIFOR ti diatur ba Dewan Lumba enggau Main Tan Sri Datuk Amar Stephen Kalong Ningkan Betong ditu, ensanus.
Tambah iya, nenagh pemisi bantu belanja RM50,000 nya, sida deka bisi perengka muzik kediri empu ila.
“Kelimpah ari nya, belanja nya mega deka dikena nyeruri gerija enggau aktiviti bukai ke pemaik raban gerija,” ku iya.
Sama bisi datai maya nya, ADUN Saribas Mohammad Razi Sitam enggau Sekretari Politik Kepala Menteri, Dr Richard Rapu.