Anda di sini

Manah agi PRN12, PRU15 diatur sereta: Masing

Advertisement
MASING
MASING

KUCHING: Presiden Parti Rakyat Sarawak (PRS), Tan Sri Datuk Amar Dr James Masing deka agi meda Pengawa Bepilih Nengeri Ke-12 (PRN12) enggau Pengawa Bepilih Besai Ke-15 (PRU15) diatur sereta.

Sapit Kepala Menteri nya madah, manah agi PRN12 ti abis timpuh kena tengah taun 2021, diatur sereta enggau PRU15.

Iya pechaya, enti PRN enggau PRU diatur sereta, nya ulih  mantu gempung perintah ke megai menua diatu nyadi tegap kelebih agi ba renggat perintah besai.

“Manah agi enti  PRN12 diatur seretaenggau PRU 15, laban kitai mesti ngenegapka politik ba perintah besai.  

“Majoriti siti tauka dua enda manahka perintah ke diatu. (Menteri Besai) Tan Sri Muhyiddin Yassin tauka sesapa rayat Malaysia ke dipilih begunaka kerusi majoriti ke mayuh kena negapka perintah,” ku iya  madah ngagai The Borneo Post ditu kemari.

Iya madah munyi nya ngenang pasal penemu mandal presiden Parti Pesaka Bumiputera Bersatu (PBB), Datuk Abdul Karim Rahman Hamzah ti madahka PRN12 enggau PRU15, patut diatur sereta.

Masing  mega madah, PRN12 dipelabaka deka diatur dalam taun tu.

Taja pia, iya jampat madahka Kunsil Nengeri (DUN) Sarawak abis timpuh naka bulan Jun taun baru, nya baru direrak lalu nya prerogatif Kepala Menteri Datuk Patinggi Abang Johari Tun Openg ngaga pemutus ngatur PRN.

“Hari bulan ke penudi endar ba jari Kepala Menteri Sarawak,” ku Masing.

Kena Hari Empat tu tadi, Abdul Karim madahka pengawa bepilih dipelabaka deka diatur ujung taun tu, seraya  madahka PRU15 patut diatur sereta enggau pengawa bepilih nengeri.

Malaysia bisi 222 kerusi parlimen ke alai Perintah Perikatan Nasional ngempu 113 kerusi, lalu penyakal ngempu 109 kerusi.

Pengawa Bepilih Nengeri Sarawak Ke-12 mesti diatur dalam timpuh 60 hari pengudah Kunsil Nengeri (DUN direrak, lalu timpuh penggal nya abis kena 7 Jun taun baru.

Advertisement