KUCHING: Rayat Sarawak ti mayuh pupu bansa enggau jalai pengarap, dilalau ngambika majak beserakup sereta bebasaka pangan diri ke pemanah nengeri enggau menua.
Tuai Megai Menua (TYT) Tun Pehin Sri Abdul Taib Mahmud madah, kitai di menua tu chukup lantang ati laban ngasaika penyerakup enggau pemaik sereta pengelantang.
“Aram mih kitai sama majak ngetanka penyerakup, aram mih kitai terus belajar bebasaka jalai pengarap orang bukai laban tu mai pemanah ngagai semua.
“Kitai mega patut berundingka pasal kaul, kitai ulih nerima pangan diri sereta anang ngereja utai ke enda patut enda ngira ngagai sapa.
“Aram kitai terus begulai sereta ngangkatka pemanah diri enda ngira nama ubah ke nyadi sekalika ketegal pemansang ke dibai ngagai kitai tauka kebuah bukai,”ku iya.
Tun Taib mansutka pekara nya lebuh iya ti meri jaku pesan ba pengerami nyuaka gelar Malaysia Book of Records ‘Pemadu Mayuh Ensera Pandak Penyerakup’ ngagai Yayasan Perpaduan Sarawak (YPS), ti diatur YPS begulai enggau Institut Pemansang Sarawak (SDI) ba sebuah hotel ditu, kemari.
Tun Taib ti nyadi Chairman, Board of Trustees YPS nerima setipikit Malaysia Book of Records ‘Pemadu Mayuh Ensera Pandak Penyerakup’ ti disuaka Ketua Pemesai Operasyen Malaysia Book of Records, Christopher Wong.
Rikod nya dijapai pengudah mujur ngumpul 1,118 ensera pandak bekaul enggau penyerakup sereta pemaik enggau pengelantang, lalu penyereta bisi diterima ari 12 bagi menua di Sarawak.
Sama bisi datai ba pengerami nya kemari Sekretari Perintah Nengeri Datuk Amar Jaul Samion, Ketuai Eksekutif YPS Datu Aloysius J. Dris, Sapit Chairman Board of Trustee YPS Datuk Patinggi Tan Sri Dr George Chan enggau ke bukai.