KAPIT: Menteri Dagang Dalam Menua enggau Pekara Penguna Datuk Alexander Nanta Linggi madahka 32 buah rumah panjai ti bisi 880 ruang bilik enggau urung 6550 iku peranak ba kandang menua nya diatu ulih ngasaika bekal elekterik 24 jam ari Skim Bekal Elekterik Alternatif Menua Pesisir Sarawak (SARES).
Bekal elekterik ngena kuasa solar beungkus RM42 juta tu kena meri penampak ngagai 32 rumah panjai ba pelilih menua Kapit enggau Bukit Mabong.
Nanta udah bejadika 'Pengawa Nyuaka Hak Ngempu Projek SARES' ba pelilih menua Kapit enggau Bukit Mabong kena Hari Dua empai lama ba Palan Pengereja Pengawa Kapit ti diatur Sarawak Energy Berhad (SEB) bekerejasama enggau Menteri Utiliti (MOUS).
“Kapasiti minimum 3,000 watt sehari ungkup tetiap ruang bilik tu kena nyendiaka lampu, kipas, televisyen, peti ais, periuk elekterik (perengka elekterik). Bekal elekterik bekuasa solar tu dibekalka ngagai ruang bilik menua pesisir kena ngangkatka tikas pengidup sida ba rumah panjai. Sida ulih meri mayuh awak ngagai aktiviti ekonomi baka betanam betupi, berikan enggau pengawa ke bukai. Sida enda ibuh ngiga pemakai basah baka dagin, ikan, manuk ke Kapit pengudah pemisi bekal elekterik tu,” ku Nanta.
Ku iya, SARES bejalaika pengawa kenyau 2016 nyentuk 2019 nyendiaka bekal elekterik ngagai 142 rumah panjai sereta meri pemaik ngagai 3100 ruang bilik bulih bekal elekterik 24 jam.
Ku iya, perintah Gabungan Parti Sarawak (GPS) ti betuaika Kepala Menteri Datuk Patinggi Abang Johari udah ngungkupka RM2.37 bilion ba taun 2019-2020 ungkup program bekal elekterik menua pesisir. Ari 93 peratus lalu diperambu deka tembu 96 peratus manggai taun 2021 . Ku iya, pengawa tu tejanggal ketegal pandemik COVID-19. Diatu kereja nya bejalai enggau lanchar.
Ditangkanka enggau nya, iya mega nyuaka setipikit SARES ngagai chairman JKKK rumah panjai iya nya Rumah Jenggot, Rumah Jalit, Rumah Laja, Rumah Tang, Rumah Jalin, Rumah Mamot, Rumah Seli, Rumah Puso, Rumah Seliong, Rumah Jelanie, Rumah Sabang, Rumah Paul Kakek, Rumah Nisson, Rumah Peter, Rumah Gindal, Rumah Jala, Rumah Inguh, Rumah Tujang, Rumah Kalat, Rumah Mansai, Rumah Barang, Rumah Tangai, Rumah Sengiang, Rumah James Saka, Rumah Narok, Rumah Jos, Rumah Tinggom, Rumah Ambu, Rumah Saging, Rumah Sebuang, Rumah Bigau enggau Rumah Jack Bidai.
Sama bisi datai ba pengawa nya Menteri Muda Utiliti ke megai tanggungpengawa SARES Datuk Liwan lagang, ADUN Pelagus Wilson NyabongIjang, ADUN Bukit Goram Jefferson JamitUnyat, Sekretari Politik Kepala Menteri Tapah Ata enggau Nicholas Kudi Jantai, Mandal Presiden SEB Sarawak Dr Chen Shiun, Residen Kapit Nyuak Keti, Sapit Residen Kapit Galong Luang, Pemesai Pelilih Menua Kapit Cerisologo Sabut, Pemesai Pelilih Menua Bukit Mabong Jefferson Jamit Unyat, OCPD Kapit DSP Freddy Bian, Injinir Kapit Bujang Kanang enggau Injinir SEB Kapit Khairulddin.