SIBU: Parti Sarawak Bersatu (PSB) deka neruska pengawa ngemansangka projek betanam betupi kena mantu nambahka penatai pemisi ungkup peranak rumah panjai ba sitak Kunsil Nengeri (DUN) Bawang Assan.
Presiden PSB Dato Sri Wong Soon Koh madah, projek betanam betupi tu siti ari pengawa parti mantu ruang bilik ti napi penanggul belanja ketegal pandemik COVID-19.
Ku iya, diatu PSB benung berunding enggau sektor korporat kena numbuhka hub pengawa betanam betupi, ti mega dalam timpuh ke sama megai tanggungpengawa meli asil tanam peranak ba kandang menua nya sereta nyual asil tu ke serata nengeri.
Wong ti mega ADUN Bawang Assan madahka, bejalaika pengawa betanam betupi ukai siti isu ungkup peranak rumah panjai tang semina bisi penanggul ba pengawa nyual asil tanam sida.
“Enti kitai ulih mantu dalam pekara tu, sida ulih terus ngiga pun penatai pemisi sereta ngangkatka tikas pengidup diri empu,” ku iya.
Dulu agi ari tu, Wong udah ngagihka benih entekai enggau sum ngagai peranak Rumah Henry Barayan, Sungai Sebedil ti nyereta projek betanam betupi PSB ba palan pemesai 10 ikar.
“Pengawa nyuaka benih enggau sum tu iya nya siti ari projek ngemunka pengawa betanam betupi PSB ba kandang DUN Bawang Assan.
“Enti tanah ba ditu engkeman lalu projek tu mujur, kami merambu deka nanam nyentukka 10,000 pun entekai dudi hari ila,” ku Wong nyemetak.
Sebedau tu, PSB mega bejadika projek ngemunka pengawa nanam limau tapah madu di Sungai Melanggan, ti mungkur 110 paung pun limau tapah madu.
Nyidi senentang program bakul pemakai PSB, Wong madahka PSB udah tembu ngagihka bantu pemakai ngagai semua 105 buah rumah panjai enggau genturung pendiau ba DUN Bawang Assan, kena Hari Minggu nyin kemari.
Senentang nyendiaka bantu baka berau enggau mi nya, Wong ngena duit iya empu kena meri pemaik ngagai 2,579 pintu ruang bilik.
“Kami meri terima kasih ngagai semua peranak rumah panjai ti udah nyambut penatai kami enggau ati ti tebuka,” ku iya nambah.