Anda di sini

PWOUM diperansang ngambi singkang ti proaktif ngangkatka raban indu

Advertisement

MIRI: Gerempung Indu Orang Ulu Miri (PWOUM) ti baru direjister diperansang ngepunka singkang ti proaktif ngangkatka raban nya ngambi gerempung nya ulih ngaul mayuh agi indu Orang Ulu ba ditu nyereta sida sereta bejalaika aktiviti seriris enggau objektif numbuhka nya.

Kaban Kunsil Nengeri Telang Usan, Dennis Ngau madahka gerempung nya ditumbuhka endang engkeman laban ngembuan tanggungpengawa ti besai ba komuniti Orang Ulu.

“Kitai semua mesti sama besaup, enti enda kitai deka tinggal ari pemansang jeman moden enggau penuh pemar tu. Tang aku mesti madahka diatu kitai nadai agi tinggal laban udah setipak enggau bansa bukai di Sarawak,” ku iya lebuh bejadika Pengerami Makai Malam Hari Orang Indu Antarabansa PWOUM ditu kena malam Hari Enam empai lama.

Pengerami makai lemai nya mega diatur kena ngintu pengawa gerempung nya ti diatu udah berejister rasmi enggau Opis Pengerejista Gerempung (ROS) lalu pengerami nya udah digulu chairman nya, Kijan Toynbee.

Ba jaku iya, Dennis ngelalau gerempung nya mekuh ba pekara ngangkatka raban orang indu dalam bidang kereja enggau pengelandik sida sereta enda ngelakka gerempung nya diguna kena ngerembaika idelogi tauka ulah negatif.

“Bisi kaul ti deka ngerembaika pengawa negatif enggau pekara baka nya ukai semina ngerusakka tanggungpengawa keterubah gerempung, tang mega nadai meri pemaik ngagai raban nya,” ku iya nerang.

Berebak enggau nya, iya ngansak PWOUM bekerejasama rat enggau gerempung Orang Ulu ke bukai baka Gerempung Raban Bansa Orang Ulu Sarawak, Malaysia (FORUM) enggau mega etnik Orang Ulu ke bukai.

“Miri sebuah mengeri ke alai bisi mayuh Orang Ulu ba ditu enggau ari bemacham etnik Orang Ulu ulih ditemu dalam penyampau ti majoriti.

“Nya alai, teruska mih enggau naka ulih ngambi kaban baru laban nengah bejalaika pengawa tu, kita deka bulih mayuh agi raban orang indu lebuh bejalaika tanggungpengawa kita kena negapka sida nengah gerempung ti ditumbuhka tu,” ku iya.

Kelimpah enggau nya, Dennis ke mega chairman Kaunsil Dagang Temuai Sarawak (STB) ngansak gerempung nya numbuhka platform kena ngelakuka produk enggau krafjari tradisional Orang Ulu.

Ku iya, platform baka nya ulih nyadi pematak temuai ke manah enggau tu mega ulih mantu sida ti ngembuan pengelandik jari dalam industri, kelebih agi ba kandang menua pesisir, ngiga peluang kena ngelakuka produk sida.

“Mayuh peluang ulih diserungkai nengah gerempung tu, asal mih kita ngereja nya enggau manah. Komiti ti dichiri mega mesti bekerejasama nentuka gerempung nya bejalaika pengawa ke patut,” ku iya.

Iya madahka projek jalai alun Sabah-Sarawak enggau Jalai Miri-Melinau (Mulu) ke Long Lama ti benung dalam proses begaga diatu, deka meri mayuh pemaik ngagai peranak ba kandang menua nya enggau penembu tu ila, kededua jalai nya nengah pasar Long Lama.

“Nyadi, perambu aku nyadi siku pengari rayat, nyema aku agi ba penuduk aku pengudah pengawa bepilih ti deka datai, aku deka nyadika Long Lama nyadi palan mensia mayuh ngulihka produk asil pengelandik jari tradisional Orang Ulu.

“Aku bejaku sentang krafjari ke digaga peranak menua tu, ukai ti dibeli ari Indonesia enggau dijual baru ditu,” ku iya.

“Aku madah ngagai kita diatu ngambika kita semua, kelebih agi ti penatai ari Baram, tau berengkah merambu enggau ngambi peluang tu,” ku ya seraya nambah tu mih chara gerempung ulih meransang komuniti Orang Ulu mujur, kelebih agi raban orang indu.

Dulu agi ari nya, Kijan ba jaku pengelalu iya madahka PWOUM enggau rasmi udah direjister ba ROS kena 9 Julai taun tu.

“Aku mesti beterima kasih ngagai YB Dennis ba pekara tu, laban semua tu mujur ketegal peransang enggau sukung ari iya pengelama tu,” ku iya baru.

Iya udah meda potensial dalam gerempung kami enggau seruran bisi meri bantu.

“Nya alai, ngarika PWOUM, aku deka madahka ngagai iya kami nyukung iya ngambika mengkang enggau dipilih baru nyadi pengari rayat ba sitak Telang Usan ungkup penggal ke bukai sereta ba taun ti deka datai,” ku iya baru.

Ba pengerami nya, Dennis mega besemaya deka ngungkupka RM10,000 ngagai gerempung nya kena bejalaika aktiviti sida.

Advertisement