TATAU: Perintah Pakatan Harapan (PH) udah diberi peluang meri servis ke rayat tang sida enda mujur ketegal mayuh ari semaya jaku manis maya pengawa bepilih enda dikeamatka, ku Kaban Kunsil Nengeri (ADUN) Kakus Datuk John Sikie Tayai.
“Sida semina pandai besemaya, tang enda ngereja nya enggau ngamatka semaya sereta jaku manis ti semina deka ngulihka pengundi aja. Baka sebedau ba Pengawa Bepilih Nengeri (PRN) Ke-14 suba, PH mayuh meri jaku semaya.
“Taja pia, pengudah diberi peluang merintah menua tu, mayuh semaya udah enda dikeamatka. Diatu, Parti Sarawak Bersatu (PSB) datai kitu nabur semaya,” ku Sikie maya ba program ‘Ngentak Rumah Panjai Baru Kampung Long Beyak’ di Ulu Kakus, Tatau kena Hari Satu kilah ensana.
Nya alai, iya ngelalau rayat ngambika enda dikemulaka enggau jaku semaya ti manis ari penyakal agi enggau sida patut lebih nemu diatu tikas semua pemujur pengawa Pakatan Harapan (PH) ti nyadi perintah besai.
“Ke beguna amat iya nya kerejasama enggau sukung ari peranak menua pesisir ngagai perintah Gabungan Parti Sarawak (GPS) ti deka nyamin mayuh macham projek pemansang ungkup peranak menua pesisir,” ku Menteri Muda ba Opis Kepala Menteri (Undang-Undang enggau Adat Bumiputera).
Ku iya, perintah Sarawak udah bejalaika mayuh macham inisiatif dikena mantu enggau ngemansangka kandang menua pesisir nengah projek pemansang baka Projek Mit Menua Pesisir (MRP), Projek Tranformasyen Menua Pesisir(RTP), Duit Turu perengkaguna Betanam Betupi enggau Skim Bekal Elekterik Alternatif Menua Pesisir Sarawak (SARES).
“Tebal agi kandang menua ulu entigis di Kakus bulih pemaik ari pengawa bejalaika projek bekal elekterik solar ari Rh Robert Nuing ngagai Rh Sujang Kakus,” ku iya.
Ku Sikie ungkup Kampung Long Beyak, projek akses bekal elekterik Sares sepenyampau RM3.5 juta ngena sistem solar ungkup 53 pintu rumah panjai nya udah dikemendarka.
Lebuh ba pengerami nya, iya mega bisi ngungkupka geran MRP RM53,000 ngagai Komiti Pemansang enggau Pengelikun Genturung Pendiau (JKKK) Kampong Long Benyak.
Sama bisi datai ba pengerami nya Pemesai Pengereja Pengawa Pelilih Menua Tatau Calvin Ligong, Penghulu Sanok Magai enggau Ketuai Kampung Long Beyak Edum Batok.