KUCHING: Ketuai Komuniti enggau Ketuai Bansa (KMKK) bisi kuasa penuh ba rayat ke dipegai sereta patut nemu tanggungpengawa sida mantu perintah bejalaika pemansang.
Menteri Muda Pengintu Pengelantang Pendiau, Pengelantang Raban Bansa,Orang Indu, Ruang Bilik enggau Pemansang Nembiak Mit, Datuk Francis Harden Hollis madah, nya alai perintah ngarapka KMKK meri kerejasama setipak enggau juluk perintah ke ngiring menua diatu.
Iya ti mega Kaban Kunsil Nengeri Simanggang mai rayat beterima kasih ngagai perintah ti chakah ngemansangka kandang menua seraya iya ngelalau ngambika enda ngembuan ulah ‘baka kachang enda ingatka kulit’.
“Sida KMKK bisi kuasa penuh ngagai rayat ke dipegai sereta patut nemu pengawa mantu perintah bejalaika pemansang.
“Nama ti dikearapka perintah ti nyiri nengah Opis Residen enggau Opis Pelilih Menua, iya nya ngarapka meri kerejasama setipak enggau juluk perintah ke megai diatu lalu ukai mai petenah ngelaban perintah ti udah nyiri,” ku iya lebuh bejaku ba program Majlis Dialog ‘Information On Wheel (IOW)’ ba Rh Sherit Tambon, Titikah, Batu Lintang, Undop, Sri Aman.
Program IOW, nya siti program ti diatur Opis Pemadah -JaPen- Pelilih Menua Sri Aman sebedau tu dikelala enggau nama ‘Perhimpunan Sivik’ ke nyadi pelasar ngatur randau alai nerangka polisi perintah, entara ejensi perintah enggau KMKK ke nyadi tuai renggat baruh.
Ba program nya ulih nyerungkai penanggul rayat nengah Tuai Rumah ti ngarika peranak rumah panjai ngenataika isu ke ditapi sereta ejensi pengemeran deka nyaut sereta nyerungkai isu ngambika ulih diputarka.
Chara tu ngemuntangka rayat ngenataika penanggul enggau enda ibuh datai ke opis sereta ulih meri peluang ngagai ejensi pengemeran datai meda ke diri empu penanggul ke nyadi.
Nyerumba program nya, Harden diberi awak nyuaka setipikit pengempu ‘Rubber Block Plantation’ (RBA) ti mungkur pemesai 343 hektar ngagai 150 pesereta projek.
Pengawa nyerahka ngagai pesereta projek iya nya sepengudah abis timpuh kunterik lima taun ari baruh jaga Opis Betanam Betupi, sereta pengudah diserahka ngagai pesereta semua bekaul enggau kebun bedandang besai nya dipejalaika pesereta empu.
Kelimpah ari nya pengawa nyuaka Kenyalang Gold Card ngagai 85 penerima ari 11 buah rumah panjai ke dikangau datai ngagai program nya.
Bisi datai ba program nya, Sapit Residen Bagi Menua Sri Aman Elvis Didit; pengari Pemesai Pelilih Menua Sri Aman Sandin Ajah, pengari Penguasa Tanah dan Survei Bagi Menua Sri Aman Tini Dimbab, pengari Pemesai Opis Pengintu Pengelantang Pendiau Raban Bansa bagi Menua Sri Aman Tingga Manggat enggau ke bukai.