KUCHING: Kepala Menteri, Datuk Patinggi Abang Johari Tun Openg madah, bebaik iya nya polisi suah dikemeranka kenyau ari Parti Sa’Ati Rakyat Sarawak (SUPP) betapi enggau penanggul beserekang penemu, ke pemaik raban bansa China.
Iya madah pengudah pengawa bepilih nengeri (PRN) 2011, SUPP betapi enggau krisis ketuai dalam parti ti lalu ngujungka parti nya pambar ngagai dua raban.
“Bekaul enggau penerang YB Dato Sri Wong Soon Koh kemari (ensanus), aku deka meri penerang ke alai bebaik suah nyadi polisi aku kenyau ari SUPP betapi enggau penanggul pambar nyadi dua raban.
“Ketuai Barisan Nasional (BN) ngaga pemutus ke alai penanggul dalam SUPP patut diputarka enggau manah entara sida iya ke belaya tauka charut dalam parti, laban ukai polisi BN nengeri masuk champur ba penanggul dalam parti komponen.
“Dato Sri Wong enggau raban iya ditingkilka ari SUPP, tang iya agi ditanka dalam perintah laban ketuai tetinggi dekaka nya mungkur semua enggau penyerakup ba raban bansa China sama bisi dalam perintah,” ku Abang Johari nengah penerang berita kemari,nimbal penerang ari Soon Koh ensanus.
Taja pia ku Abang Johari, penanggul majak nyadi nyentuk maya niang Pehin Sri Adenan Satem nyadi Kepala Menteri.
Utai ke nyadi ba pengawa bepilih besai sebedau tu, Wong enggau raban iya dikemendarka ngena lambang BN, ti enggau juluk deka nyerakupka raban bansa China sereta ngambika ulih ngambi bagi dalam perintah.
Ku iya, rejista SUPP nyau deka dikinsil pengudah Wong ditingkilka SUPP sereta numbuhka Parti Rakyat Bersatu (UPP) lalu udah nya, perintah ti ditumbuhka nyadi BN-Plus sereta dikearapka dua raban nya ulih bekerejasama ke pemaik raban bansa China.
“Kebendar iya, Niang Pehin Sri Adenan ti ngasuh aku bejadika UPP. Udah nya aku bejadika nukar nama ari UPP ngagai Parti Sarawak Bersatu (PSB).
“Lebuh aku megai pengawa nyadi Kepala Menteri, aku nampung polisi nya ke alai Dato Sri Wong ditanka nyadi menteri. Tuju semua tu iya nya kena meri awak ngagai kededua raban nya bebaik,” ku iya.
Taja pia ku iya, sekalika sengaja tauka enda, ketuai PSB ngambi kaban parti komponen taja pan nemu nya tau ngeruga kereja dalam siti tim dalam GPS.
“GPS bisi polisi ‘nuan negu siku, nuan negu semua’ lalu pekara ti dikereja PSB belaban enggau pengeran kami deka nyerakupka rayat Sarawak.
“Bepelasarka aktiviti pemadu baru PSB, amat ngayanka parti nya nadai agi ati deka bekerejasama lalu diatu bemain dalam sida iya empu ngelaban GPS ngena kaban politik ke enda puas ati.
“Aku udah minta ketuai raban bansa sereta mega ketuai korporat nyaup ngambika sida bebaik tang nadai asil, lalu ngelui ari tu aku nyerah ngagai rayat ngaga pemutus,” ku iya.
Ensanus, Presiden PSB Dato Sri Wong Soon Koh mejah penerang Kepala Menteri Datuk Patinggi Abang Johari Tun Openg apin lama ti madah parti nya ditumbuhka kaban politik ke enda puas ati.
Taja pan Abang Johari enda nyebut PSB maya ke meri penerang nya lebuh bejaku ba Pengerami Bejadi Konvensyen Parti Pesaka Bumiputera Bersatu (PBB-)di Miri kena Hari Enam nyin tadi, Wong madahka Kepala Menteri nya amat nya nujuka nya ngagai parti ti betuaika iya.
Wong ti mega Kaban Kunsil Nengeri Bawang Assan mega madah, Abang Johari ti nyadi chairman GPS kala nyadi orang ti bejalaika pengawa ke besai reti ba pengawa numbuhka PSB.