KUCHING: Ba ulu Batang Rajang enggau ai pasang raya ba sekeda kandang endur ke baruh ngujungka tikas ai niki ba kandang menua Sibu, Kanowit, Song enggau Kapit lalu ngampuhka tebing sungai kenyau 7 September nyin tadi.
Chairman Opis Sungai Sarawak, Murni Suhaili ba penerang iya madahka malam ensanus, ampuh bah tu nyadi ketegal ujan bangat ti enda ngengetu ba semua kandang endur nya.
“Gaya ai besai niki ngagai tebing sungai nyentukka sekeda laman rumah genturung pendiau, rumah kedai enggau rumah panjai ti bisi semak tebing sungai mega kena ampuh bah kelebih agi ngelingi mengeri Sibu, Kapit enggau Kanowit.
“Ketegal gaya penyadi tu semua penguna sungai, pengempu, juragan, ejen, operator bot tauka kapal enggau komuniti kapal dilalau ngambi deriba bot sida nya enggau bejejimat sereta belubah lebih agi lebuh nengah kandang endur genturung pendiau enggau palan rumah,” ku iya dalam penerang kilah lemai ensanus.
Pemar ke bukai ku iya nambah, dipelaba deka diasai penguna sungai baka gaya mua hari ti besebun, apat kayu anyut, ai deras enda ulih disadang enggau napi pemar meda jalai.
Murni mega ngelalau semua Juragan ngambi ngelekatka lampu lebuh dalam pejalai sida maya ti nengah ai sungai.
LSS ku iya nyemetak, deka nyadung sebarang penerang nengah media chelak tauka elektronik sereta ngeluarka notis tauka gerah ngagai semua penguna sungai nyema gaya nyadi balat agi.
Pia mega, pengemeran Kolam Balak enggau Kilang Papan ti beoperasyen ba tebing sungai mega dilalau ngambika ngemataka kayu batang enggau uras industri ari kilang sida ari anyut dibai ai deras ke tau meri penusah maya nengah sungai enggau kandang endur rumah.
Bot orang tambang patut disikap penuh enggau perengka pengelikun ba dalam bot sida ninting maya ke guna lebuh bisi penusah ngenyit nyadi.
Pemesai Penerit Adat LSS deka bejalaika pengawa pansik ngagai perengka pengelikun dalam bot orang tambang ninting maya.
Orang tambang bot tebuka kelebih agi nembiak sekula ti diberi jaket pengelikun ari Opis Pelajar Nengeri Sarawak (JPNS) dilalau seruran ngena jaket pengelikun nya maya dalam bot.
Bala orang tambang mega dikeingat seruran bejejimat maya nepan tauka angkat ari bot orang tambang laban tebal agi jeti temuai ba semanjai sungai ke kena ampuh ai sereta lichau ketegal hari ujan tauka ampuh bah.
Ngagai bot ti engkah ba waf, terminal tauka pengkalan patut dikemata belama enggau enti ulih tambahka agi tali kena nanchang bot ngambika enda putus ditaban ai deras ti dipelaba deras agi ari baka selama.
“Peranak ke bepalan ba semanjai sungai dilalau seruran bejejaga lebih agi enda ngelakka nembiak bemain ba luar rumah lebuh nadai dijaga.
“Sida patut suah matau gaya ba struktur tebing sungai enggau bepindah ngagai palan ke selamat agi sema gaya tebing sungai nya deka tusur lalu nya ulih meri penusah ngagai rumah diri empu tauka nerima gerah ngaga baka nya ari opis ke bekaul,” ku iya nambah.