KUCHING: Lima Gerempung Ukai Dikuasa Perintah (NGO) bisi ngaga ripot polis kemari bekaul enggau penerang kontroversi pasal Bup Kudus ti ngaul Kaban Parlimen Pasir Putih Nik Mohammad Zawawi.
Ripot polis nya digaga ba Balai Polis Sentosa pagi kemari dikena ngansak opis bekuasa bejalaika pengawa mansik Kaban Parlimen nya.
Kelelima NGO nya minta opis bekuasa bejalaika pengawa mansik silik bekaul pekara nya sereta kena nyeliah barang bagi sesapa aja kelebih agi ketuai politik ngambika enda mantai isu sensitif ti bekaul enggau jalai pengarap.
Lima NGO nya, Gerempung Adat Asal Bidoyoh, Gerempung Dayak Iban Sarawak (Sadia), Gerempung YATT Sarawak, Gerempung Aspirasyen Rayat Sarawak (SAPA)enggau Dayak Bukit Kelingkang mantaika pengasa ati enggau penerang ari Kaban Parlimen nya.
Sekretari Gerempung Adat Asal Bidoyoh Alim Miden madah, penerang Kaban Parlimen nya ngamah Parlimen Malaysia sereta iya orang ti enda patut nyadi siku pengari rayat.
Ku iya nyemetak, raban sida ngansak Nik Mohammad minta ampun enggau narit baru penerang ke dibantai iya.
Pia mega ku iya, Kepala Menteri Datuk Patinggi Abang Johari Tun Openg patut nagang Nik Mohammad ari tama ke Sarawak.
Nangkanka nya, Sekretari Agung Sadia, Nicholas Mujah madah, Kaban Parlimen Pasir Puteh nya enda patut ngemansutka penerang baka nya laban ba komuniti Iban udah lama idup begulai taja bisi pengarap Kristian, Islam enggau Budha ba raban sida.
Kami ngarap tetiap kaban parlimen patut mandangka ulah ti bebasa enggau bejejimat lebuh mantaika jaku, ku iya nyemetak.
Pemadah Gerempung YATT Sarawak Fredy Misid madah, Kaban Parlimen Pasir Putih ti bejaku sentang pengarap bansa bukai dalam parlimen udah jauh amat limpang.
Ngagai iya (Nik Mohammad) ti madahka Bup Kudus udah diubah amat ngasaka ati rayat Sarawak ti bisi urung 70 peratus iya nya orang ukai pengarap Islam.
Kami ari YATT enggau aku pechaya mayuh agi rayat Sarawak enda ngira bansa enggau jalai pengarap mantah penerang ti dibantai Kaban Parlimen Pasir Putih tu, ku iya.
Penumbuh Begulai enggau Dayak Bukit Kelingkang Lawrance Clement madah, raban sida mega ringat sereta asa enggau penerang kaban parlimen nya.
Presiden SAPA Dominique Ng mega madah, Nik Mohammad enda patut dijaga ba baruh kuasa Dewan Rakyat kelebih agi lebuh iya ngaitka sentang nadai ditagang nitihka pengarap diri enggau mantai pekara ti sensitif bekaul enggau jalai pengarap.