SRI AMAN: Menteri Muda Pengelantang Komuniti Sarawak, Datuk Francis Harden Hollis ngelalau rayat ba pelilih menua tu ngambi bejejaga enggau jaku penyakal ti enggai meda penyakah pemansang di nengeri Sarawak kelebih agi ba Bagi menua Sri Aman.
Tu ditambah mega enggau penegap politik Sarawak ari baruh Gabungan Parti Sarawak (GPS) matak pengingin ati parti penyakal deka megai perintah enggau ngatur pemansut wang.
“Pemansut wang Sarawak ba baruh GPS endang tegap bepelasarka ngagai atur perintah nengeri Sarawak ari baruh iring Yang Amat Berhormat (YAB) Kepala Menteri nampung projek ke udah dikinsil perintah Pakatan Harapan (PH) suba,” ku Harden.
Harden ke mega Kaban Kunsil Nengeri (ADUN) Simanggang madah munyi nya lebuh bejaku ba ‘Program Agriculture Community Outreach Programme (AgriCOP)’ ke diatur Opis Betanam Betupi Bagi Menua Sri Aman bepalan ba Rumah Kadir Selai, Lepong Simpai Ili, Sri Aman ditu.
Ku iya, atur ekonomi ke manah nyadika Sarawak ulih melanja sekeda projek besai nengah belanja nengeri empu.
“Momentum pemansang tu patut ditanka enggau rayat mega mantu nengah meri sukung penuh ngagai perintah ke diatu,” ku iya nyemetak.
Ku iya agi, ba sitak Kunsil Nengeri (DUN) Simanggang projek pemansang semampai bejalai ukai semina semak musim pengawa bepilih baka ke dipadah penyakal.
“Mina diatu kami bebendar nambahka agi pemansang ke pemaik rayat. Politik pemansang perintah GPS nadai ‘gimik’ nya endang agenda ke terus dipejalai,” ku iya nerang.
Program Agriculture Community Outreach Programme (AgriCOP) ke diatur Opis Betanam Betupi Bagi Menua Sri Aman tu tuju kena ngingatka baru chara betanam enggau betupi ngambi bulih asil ke optimum.
Bisi 96 iku pesereta ngambi bagi dalam program ti meri penguntung ke beguna ngagai pengemeran pengawa betanam enggau betupi di sitak Sri Aman.
Ba program nya, semua pesereta udah diberi licha sentang pemansang betanam ti mungkur Tekonologi Nanam Lada ari Hazman ari Lembaga Lada Malaysia, Sri Aman, Teknologi Nanam padi ari Pemesai Betanam Betupi Sri Aman, Chadum Lawan, ‘Taklimat Ternakan Bukan Ruminan’ ari Romeo ari Opis Servis Veterinar Bagi Menua Sri Aman, Licha Nupi Ikan Dalam Pegung Tanah ari Pembantu Opis Berikan, Patrick Layong sereta Licha sentang Pengelantang Pendiau ari Pemesai Opis Pengintu Pengelantang Mensia Mayuh Sri aman.
Sama bisi datai ba program nya, pengari Pemesai Opis Pelilih Sri Aman, Sandin Ajah, pengari Pemesai Opis Betanam Betupi Bagi menua Sri Aman, Wendy Ferrina Tarry, pengari Pemesai Pengintu Pengelantang Mensia Mayuh Bagi Menua Sri Aman, Abdul Shamat Kassim sereta Sapit Ketuai Kaunsil Opis Pelilih Sri Aman (MDSA), Kunsilor Andar Suntai.
Ba pengerami nya, Harden mega bisi nyuaka Kenyalang Gold Card (KGC) ngagai penerima ari semilan buah rumah panjai sepenyampau 64 iti enggau Harden udah ngemendarka bantu MRP RM3,000 ngagai Komiti Pemansang enggau Pengelikun Genturung Pendiau (JKKK) Lepong Simpai Ili lalu RM2,000 ungkup Biro Indu.