BETONG: Pasar Spaoh deka ngasaika ubah pemansang nengah sekeda projek pemansang enggau utai ke baru ti benung digaga tauka ba renggat diperambu di menua nya.
Sapit Kepala Menteri, Datuk Amar Douglas Uggah Embas madahka jalai besai tebing tasik Sarawak ti mansa pasar Spaoh deka nambahka penyampau perengka pengangkut enggau orang ti singgah ba pasar nya.
Ku iya, projek ke beungkus RM116 juta nya deka berengkah ari Saka Betong ke Spaoh.
“Kitai deka begunaka mayuh agi kedai kelebih agi kedai makai kena napi guna penguna ti nengah jalai besai nya.
“Siti agi pemansang besai ti deka dipejalaika iya nya STOLport Bebuling ke beungkus RM108 juta ke tentu deka matak temuai enggau orang dagang ngagai pasar nya,” ku iya lebuh ke bejaku ba pengerami nutup program ‘Jalinan Mesra GPS (Gabungan Parti Sarawak) Bersama Masyarakat Spaoh’ di Dewan Raban Bansa Spaoh ditu, kena Hari Minggu nyin tadi.
Uggah ke mega Menteri Betanam Betupi Moden, Tanah Adat enggau Pemansang Kandang Menua madah, perintah nengeri diatu benung dalam proses ngaga pasar baru ke beungkus RM5 juta, sebuah kompleks lumba enggau main ke baru (RM15 juta), jematan ikonik (RM30 juta), opis pelilih menua ke baru (RM5 juta) enggau mayuh agi ke buka.
Bela bisi di perambu iya nya ngangkatmanah Klinik Pengerai Spaoh kelimpah ngagai Palan Giat Mara dia nyadi palan pematih ungkup bala nembiak kena ngangkatka penatai pemisi sida, tambah iya.
Taja pia ku iya, potensial besai Spaoh iya nya dalam sektor betanam betupi.
“Spaoh sebagi ari kandang Agropolitan Bukit Sadok ke benung kitai (perintah nengeri) disedia ngambika dikemansang.
“Kitai bisi potensial ke manah (dalam sektor betanam betupi) tang kitai napi penanggul besai orang nguan menua tu mayuh udah tuai lalu bisi beberapa iku orang dagang aja.
“Aku ngarapka bala nembiak pulai kitu lalu ngemeranka pengawa betanam betupi moden, siti dagang ti meri penguntung,” ku iya.
Ku iya, perintah GPS bisi perambu besai enggau program ungkup nembiak ti deka ngaul diri ba sektor betanam betupi moden.
Ku iya, sida ke bisi ati tau masuk program ti dipejalaika ari baruh Agricop Opis Betanam Betupi tauka ‘Program Jangkauan Komuniti Pertanian’ ti dipejalaika ba sekeda rumah panjai ditu, dalam bulan tu.
Sentang politik, Uggah ke mega Sapit Chairman GPS, ngarapka rayat lalu majak nyukung perintah laban nya deka nentuka semua projek pemansang ti diperambu mudah dipejalaika.
“Pengawa Bepilih (nengeri) deka diatur enda lama agi, lalu penyakal...sida deka datai (kitu) baka ke ngelama tu.
“Sida deka ngachuk runding mensia mayuh lalu nyadung pekara ke bula dikena bejaika perintah, tang ba kami, kami nadai jam deka belaya.
“Kami deka nambahka pemanah pengidup rayat sereta mantu rayat ngulihka penatai pemisi ke meruan agi,” ku iya.
Berebak enggau nya, lebuh bejadi Serakup Orang Pichin Kereja Perintah Spaoh, Uggah minta kaban serakup nya kelebih agi pengajar ke udah pinchin, nyaup meri tuisyen enda bebayar ngagai bala nembiak.
Ba pengerami nya, iya bisi ngungkupka geran RM30,000 ari iya empu enggau Kaban Parlimen Betong Datuk Robert Lawson Chuat ngagai serakup nya.
Dulu ari nya, Uggah enggau Sekretari Politik Kepala Menteri Dr. Richard Rapu ngulu pengerami ke diatur Kelab Main Gasing Spaoh.