KUCHING: Gempung Gerempung Pengajar Sarawak (STU) ngarap perintah mega ulih nyendiaka agih belanja ke chukup ke tuju dikena ngangkatmanah kuarters pengajar di nengeri tu.
Presiden STU Macky Joseph madah serakup nerima manah pengawa perintah deka nyendiaka bantu tambah dikena ngemanahka sekula repuk di nengeri tu ari baruh Atur Pemansang Malaysia Lumpar Ke-12 (RMK12).
Bantu tu iya nya tambah ngagai RM1 bilion ke udah diungkupka ba baruh sempekat bayar ‘kontra’ entara perintah nengeri enggau perintah besai.
Taja pia ku iya, serakup nya arap nengah bantu ke chukup dikunsi ungkup ke guna kuarters pengajar ke manah agi endur diau.
“Kuarters pengajar patut disikap ngena perengkaguna ke patut enggau ba tikas gaya ke manah ninting maya laban nya palan endur pengajar belelak pengudah tembu jam ngajar.
“Pengajar begunaka palan ke lantang endur belepa sereta dikena ngaduka pengawa kena ngajar sida ba hari ke bukai,” ku iya dalam penerang nya.
Serakup ku Macky arap sekula di nengeri tu lebih agi ba kandang menua pesisir likun sereta mudah dikaul nengah jalai alun tauka jalai ke bukai.
Kelimpah ari nya, ku iya akses internet ke deras agi patut mega diberi perati ungkup ke guna bala nembiak enggau pengajar.
Berebak enggau nya, Sapit Menteri Pelajar MUslimim Yahaya maya aum Parlimen bedau lama udah madahka, ari baruh RMK12, bisi 529 buah sekula agi deka dikemanahka sereta deka digaga baru di Sarawak.
Ba baruh RMK11 ku iya, Opis Menteri Pelajar ngenataika sepenyampau 606 sekula repuk di Sarawak ngambika diseruri enggau diangkatmanah.
Nya alai ku iya, penyampau semua sekula ti deka diseruri enggau diangkatmanah di Sarawak iya nya urung 1,200 buah ba baruh RMK11 enggau RMK12.