KUCHING: Aktiviti ekonomi di Bagi Menua Mukah enggau ngelingi kandang menua nya deka mansang ngerembai pengudah Padang Bilun Mukah udah tembu digaga ba taun 2021 ila.
Kaban Kunsil Nengeri (ADUN) Jemoreng, Datuk Juanda Jaya madahka, pengawa ngaga padang bilun nya endang udah lama dianti rayat di Mukah.
“Pengawa pemansang ti besai benung nyadi di Bagi Menua Mukah. Tiga jematan besai benung digaga iya nya Jematan Batang Igan, Batang Lassa enggau Batang Paloh.
“Udah tentu pengudah tu ila aktiviti ekonomi deka richah agi ditu enggau mega aktiviti dagang temuai,” ku iya lebuh dipinta nerang sentang projek Padang Bilun Mukah.
Juanda nambah, servis bilun ke bisi ari Mukah ke Kuching enda chukup kena nangkup penyampau pemayuh orang tambang.
Tu laban ku iya majak mayuh institusi pelajar tinggi enggau ejensi perintah ditumbuhka di Mukah baka Politeknik, Universiti Teknologi Mara (UiTM), Kolej Laila Taib enggau ke bukai.
“Aku ngarap berengkah 2021 deka mayuh agi kompeni bilun nambah penerebai sida ke Mukah kelimpah MASwings.
“Kompeni bilun ke bukai baka AirAsia mega ulih nyerungkai potensial penerebai baru ti ngaul Mukah enggau kandang menua bukai,” ku iya nambah padang bilun baru tu ulih dikemesaika barang maya laban bepalan ba tanah rizab perintah enggau endur ti besai.
Berebak enggau nya, Sapit Kepala Menteri Tan Sri James Jemut Masing maya ngelawa ngagai padang bilun nya madahka, kereja ngaga tejanggal pengelama tiga bulan ketegal pentin Atur Nagang Pemindah (PKP).
Padang bilun enggau ungkus sepenyampau RM360 juta tu deka ulih ngena bilun bansa ATR dibanding enggau Twin Otter aja maya diatu.
Penembu tu ila deka nyadi perengkaguna ke beguna amat dalam industri ke benung mansang di Mukah enggau kandang ngelingi nya.