LUBOK ANTU: Projek ngangkatmanah jalai kem batang ba kandang menua Ulu Lemanak, Fasa 4 ti udah dikemendarka enggau ungkus belanja semua sepenyampau RM12 juta.
Kaban Parlimen (MP) Lubok Antu, Jugah Muyang madahka tinda projek nya dipelaba deka dikeluarka kena Disember taun tu enggau perintah diatu dalam renggat ngelangkar jalai nya.
Iya madah jalai tama ngagai genturung pendiau di semanjai Ulu Batang Ai, Lubok Antu mega udah dikemendar dipejalai ari perintah besai enggau ungkus RM187 juta.
Projek nya deka ngemanahka jalai sepenyauh 25 km lalu diatu benung ba renggat diperundingka sereta deka ditinda dalam bulan Mac 2021.
Pia mega, projek ngangkatmanah jalai Ulu Skrang, Lubok Antu ba renggat kedua enggau ungkus semua RM28.5 juta udah dikemendarka.
“Maya diatu, status projek dalam renggat ngelangkar enggau deka ditinda kena bulan Oktober 2020,” ku iya.
Jugah madah munyi nya ngagai Utusan Borneo ditu bekaul enggau projek pemadu baru ba sitak iya ti udah dikemendar perintah besai baka udah dipadah Menteri Pemansang Menua Pesisir, Datuk Abdul Latiff Ahmad maya aum Dewan Rakyat bedau lama ti udah.
Ku iya, pengawa ngangkatmanah Jalai Basi ke Kuching, jalai besai Sibu ke Bagi menua Sri Aman semanjai 25 kilometer mega udah dipinta enggau deka dipejalaika ba baruh RMK-12 nengah ungkus RM157 juta.
“Taja pia, nya nitihka ngagai pemendar ari Unit Perambu Ekonomi (EPU) Opis Menteri Besai enggau ba tikas duit perintah diatu,” ku iya nambah.
Berebak enggau nya, Jugah madahka iya beterima kasih ngagai perintah ti seruran ngemerat enggau enda ninggalka sida ba belakang ari sukut pemansang.
“Kami amat beterima kasih ngagai Menteri (Pemansang Menua Pesisir) enggau perintah besai laban udah ngemendarka sekeda projek ba sitak Parlimen Lubok Antu.
“Semua tu ulih mantu ngubah tikas ekonomi peranak ngelingi kandang menua Lubok Antu,” ku iya nambah agi.