SIBU: Urung 2,434 iku ukui udah dituchuk vaksin ari baruh Program Vaksinasyen Anti-Rabies ba ditu.
Nitih ku Penulung Pemesai Veterinar Sibu Anthony Janggu, sekeda ari penyampau nya, 534 iku ukui nya ti diberi vaksin ba Taman Rimba Bukit Lima ditu kena 2 enggau 3 Julai empai lama.
“Kena 8 enggau 9 Julai, urung 215 iku ukui udah diberi vaksin ba Balai Komuniti Sibujaya,” ku iya lebuh ditelefon pengarang berita, kilah ensanus.
Nangkanka nya, bisi dua iku ukui udah dituchuk vaksin ba Sungai Merah Heritage Walk Point ditu ensana.
Kelimpah ari nya, kena 15 enggau 16 Julai, bisi 518 iku ukui udah dituchuk vaksin ba Hui Ning Garden, ku iya nambah.
“Program vaksinasyen anti-rabies tu udah dilanjar nyentuk 23 enggau 24 Julai ba Lake Garden Taman Permai, ari pukul 9.30 pagi nyentuk 3 lemai, lalu 419 iku ukui udah diberi vaksin.
“Kena 18 enggau 19 Ogos, program tu deka dipejalaika ba Taman Hing Hua, Taman Seduan ari pukul 9.30 pagi nyentuk 3 lemai. Pengudah nya ba palan ngengkahka entukar ba Librari SMC kena 26-27 Ogos, ari pukul 9.30 pagi nyentuk 3 lemai.
“Program vaksinasyen nya deka dilanjarka ba palan ngengkahka entukar Swan Square di Ulu Sg Merah, kena 2-3 September, jam ke sama,” ku iya.
Ku iya nambah, sida deka bejalaika pengawa tu kena 9-10 September ba palan ngengkahka entukar di Teku, lalu 17-18 September ba palan ngengkahka entukar Taman Satria ari pukul 9.30 pagi 9.30 pagi nyentuk 3 lemai.
Berebak enggau tu, vaksinasyen tu semina diberi ngagai ukui ke beumur tiga bulan ke atas.
“Ukui nya mesti gerai sereta enda betubuh bisi.
“Semua orang ke ngempu ukui patut ngena sengkabung idung enggau mulut sereta nyaga seraka fizikal, lebuh sida datai ba pengawa tu. Pengangat tubuh sida deka diperasa lalu perengka dikena nuchi jari bisi disediaka,” ku iya nambah.