KUCHING: Kepala Menteri (KM) Datuk Patinggi Abang Johari Tun Openg nyangkal Pengawa Bepilih Nengeri (PRN) deka diatur dalam timpuh ke semak tu.
Bejaku ngagai raban pengarang berita ditu kemari, Abang Johari ti mega Chairman Gabungan Parti Sarawak (GPS) madah pengawa bepilih nengeri agi lama.
“Sapa madah? Agi lama,” ku iya lebuh dipinta meri penerang bekaul sepkulasi iya nya PRN engka deka diatur ba bulan Oktober taun tu.
Dulu ari nya Abang Johari nemuai ngagai palan projek jematan Sungai Bintangor ba Jalan Datuk Ajibah Abol ditu seraya ngabas pemansang projek.
Dipinta ngenang pasal parti politik baru ti ditubuhka ex Menteri Besai Tun Dr Mahathir Mohamad, Abang Johari taja pia enggai ngenang panjai pekara nya.
“Sebarang ku iya parti baru ka. Aku enggai meri penerang,” ku iya nyaut enggau pandak.
Apin lama, Dr Mahathir madah iya deka numbuhka parti politik baru ti bepelasarka pengawa negika bansa Melayu.
Parti baru nya ku iya bisi bida enggau parti Melayu enggau Pribumi bukai.
Parti baru tu mega nadai kaul enggau enda ngira bagi parti champur Pakatan Harapan (PH) tauka Perikatan Nasional (PN).
Ngenang pasal penerang PAS Sarawak ti bisi ati deka bediri minta pilih maya pengawa bepilih ke deka datai, Abang Johari madah nya bepanggai ngagai sida iya.
“Barang ku jaku sida iya. Pengawa bepilih agi lama,” ku iya seraya madah diri enda nemu sekalika juluk sida nya ketegal diasuh renggat tinggi sida tauka ukai.
Abang Johari mega madah GPS enda patut irau tauka takut nyema PAS bisi juluk deka bediri minta pilih dalam pengawa bepilih ke deka datai.
Dulu agi ari nya, Pesuruhjaya PAS Sarawak, Jofri Jaraiee dalam penerang berita ensanus madah parti udah nemu beberapa bagi sitak ti endur belaban.
Kaban parti ku iya udah nurun betemu eggau raban bansa taja pan nadai menang sebarang sitak maya pengawa bepilih sebedau tu.
Taja pia penerang Jofri nya dipeda enda sebaka enggau penerang Presiden PAS Datuk Seri Hadi Awang ti madah enda bediri minta pilih ba Sarawak.