Anda di sini

Perintah Sarawak deka terus mantu sekula di nengeri tu

Advertisement
 Ripin nyuaka replika kunchi Dewan Sri Tunku ngagai Tang seraya diperatika Charles.
KELAI: Ripin nyuaka replika kunchi Dewan Sri Tunku ngagai Tang seraya diperatika Charles.

MIRI: Perintah nengeri deka majak mantu tetiap sekula ba semua sitak enggau nambahka perengkaguna ke patut sereta bejalaika kereja ngangkatmanah.

Kaban Kunsil Nengeri (ADUN) Lambir Ripin Lamat madahka, tu deka nentuka pengelantang lebuh pengawa ngajar enggau belajar nembiak sereta pengajar dikena ngulihka pelajar ke pengidup dudi hari ti manah agi.

“Tu mih komitmen kami ke beguna amat. Tikas kualiti pelajar anak kitai deka seruran niki enggau nyadi mensia ti beguna, ketuai dudi hari ila, nyadi pengarap apai indai sereta diri sebilik, nyadi raban ti efektif dikena mutarka penyeranta ba kandang menua pesisir enggau mengeri.

“Nengah pelajar udah tentu ulih ngangkatka sosio-ekonomi enggau tikas pengidup komuniti kitai,” ku Ripin nerang maya bejadika Dewan Sri Tunku SMK Taman Tunku kemari.

Ripin madahka, entara pekara ti dikemeratka perintah nengeri iya nya ngangkatmanah sekula repuk kelimpah nangkup guna sekula ngulihka perengkaguna baka balai mayuhguna dikena begempuru sereta aktiviti lumba enggau main.

“Kami deka seruran mantu sekula ba sitak kitai ngambika fasiliti ulih ditambah kitai enggau meri pengelantang ngagai nembiak sereta nyadi perengkaguna sekula. Tu polisi perintah nengeri Sarawak ari baruh iring Datuk Patinggi Abang Johari,” ku iya nerang.

Ba pengawa tu mega bisi diatur pengawa meri insentif ungkup nembiak ke nyulut ba PT3 enggau pengawa nyiri pengawas.

“Pemujur sehari tu (kemari) iya nya siti perais ke diterima semua kita ketegal ba pemendar enggau komitmen belajar enggau bebendar. Ambi nya nyadika singkang dikena mansang ngambika nembiak deka mujur agi ba renggat ke lebih tinggi.

“Ngagai sida ti kurang benasit, ukai reti nya nadai pemujur belama nya. Ambi nya nyadika peransang dikena nyadi siti transformasyen ari sukut pemendar disiplin enggau komitmen dalam mekuh ba bidang pelajar,” ku iya.

Ripin madahka, komitmen apai indai, pengajar enggau sekula mega ulih nyamin pemujur nembiak dalam akademik enggau kokurikulum.

“Beri mimit awak dikena meri peransang enggau sukung ngagai bala nembiak. Sida deka ngasai diri diterima laban apai indai begulai ngaul diri ba aktiviti ti diatur sekula enggau PIBG,” ku iya nerang.

Sentang Dewan Sri Tunku, nya dipejalaika ari baruh projek Program Transformasyen Menua Pesisir (RTP) ungkup DUN Lambir.

Perintah nengeri ngungkupka sepenyampau RM400,000 ba renggat keterubah enggau RM200,000 ungkup renggat kedua.

Balai sekula diangkatmanah berengkah 1 Julai sereta disadang tembu kena 1 Disember 2019 lalu sepenyampau 1,000 iku nembiak ulih ba endur nya.

Sama bisi datai Prinsipal Tang Cheng Mun enggau Chairman PIBG, Charles Emparang Bugat.

Advertisement