BINTULU: Perintah nengeri neruska pengawa dalam ngenegapka sektor betanam betupi di nengeri tu nengah ngemayuhka agi penyereta peranak dalam bidang tu taja pan dalam skala ti mit dikena nyungkak penatai pemisi sereta tikas ekonomi nengeri tu.
Menteri ba Opis Kepala Menteri (Integriti enggau Ombudsman) ti mega Kaban Kunsil Nengeri (ADUN) Jepak Datuk Talib Zulpilip madah, tetiap pemansang ekonomi ukai semina mekuh dalam sektor bumai bedandang besai tang mega ungkup sida ti bumai dalam skala ti mit ba genturung pendiau diri empu aja pan sama dikemerat laban nya ulih nambahka penatai pemisi.
Ku iya, sektor betanam betupi ulih nyadika siti bidang dagang nya alai pengerindu deka betanamka utai lalu nyual asil nya ari sida ti bekaul endang disukung laban nya ulih nyungkak ekonomi rayat.
“Lebuh bisi program ti bekaul bisi diteruska, nya mandangka perintah siruka ekonomi rayat. Ukai sektor bekebun bedandang besai aja tang mega ungkup sida ti bekebun tauka bumai ba skala ti mit mega bisi nyaup dalam pekara tu,” ku iya bejaku lebuh ti bejadika ‘Community Extension Outreach Programme’ (CEOP) ti mungkur Kus Sistem Fertigasyen Ungkup Betanam Chabi. Program tu udah digulu 130 pesereta ke diatur ba Balai Mayuh guna Komiti Pemansang enggau Pengelikun Genturung Pendiau (JKKK) Kampung Baru kemari.
Ku iya madah, agih belanja mega bisi diungkupka perintah, nya alai peranak di sitak Jepak enda tinggal dalam nyereta program bansa nya lalu mayuh agi program deka dipejalaika.
“Aku deka meda peranak di sitak tu ngambi bagi, ni nemu nengah bidang betanam tu ulih nangkup sereta nambahka penatai pemisi, kelebih agi enggau pemisi teknologi betanam betupi ti seruran berubah,” ku iya.
Ku Talib madah, program bansa nya ukai semina ulih nangkup penatai pemisi tang mega muntang digaga ti ngaul pengawa nanam chabi, sayur nyengkaum daun ulam ke nyamai ditanam.
“Aku ngarapka ulih meda bala orang ti bumai bekebun ti mujur lalu terus ulih mantu enggau naka pemayuh ti ulih bala pekebun bukai ngambika sama nyulut sereta pengawa bumai bekebun terus dipejalai lalu ulih majak ngerembai,” ku iya nambah.
Dulu ari nya, Pemangku Pemesai Opis Betanam Betupi Bintulu Anggang Jimbun madah, agih belanja ungkup fasiliti betanam betupi udah dikemendarka Sapit Kepala Menteri ke mega Menteri Betanam Betupi Moden, Tanah Adat enggau Pemansang Kandang Menua Datuk Amar Douglas Uggah Embas ba pun taun 2020 ti diatur nitihka sitak DUN berindik ari pemujur projek Dana Pemudahcara Pertanian (AFF) 2019.
“Ungkup DUN N67 Jepak, bisi tujuh palan ti diperambu ungkup CEOP ti nyengkaum empat di Pelilih Menua Bintulu lalu tiga di Tatau,” ku iya seraya nambah pengawa ngatur CEOP tu iya nya ti keterubah ba DUN Jepak enggau mega Bagi Menua Bintulu.
Ku iya nerang, pengawa ngatur CEOP ti deka datai diperambu ba balai Kampung Jepak Hulu kena ujung bulan Ogos ke lalu ditangkan ba Rumah Assan Sungai Silas kema bulan September sereta di Rumah Joshua Manit Jali Bintulu-Tatau kena bulan Oktober ti deka datai.
“Batang tuju CEOP tu iya nya ngiri penemu bekaul teknologi betanam betupi ke diatu diungkup ngagai raban ti bekaul nengah chara meri licha, pengawa pemandang enggau model demonstrasyen betanam betupi,” ku iya.
Nitih ku Anggang, nengah chara tu ulih mega nambahka penemu raban ti bekaul dalam pengawa ngangkatka produk sereta kualiti asil bumai bekebun, penatai pemisi enggau sosioekonomi ruang bilik.
Sama bisi ba program nya bini Talib, Datin Dr Zaliha Abdullah, Sapit Residen Bagi Menua Bintulu Hussaini Hakim, Chairman Koperasi Fertigasyen Borneo Mohd Ariffin Abdullah, Temenggung Rosli Kamaruddin, Pemancha Awang Merais Pengiran Ismail, Penghulu Drahman Sisit, pemesai kanan Opis Betanam Betupi Bintulu sereta ketuai komuniti di kandang menua nya.