MIRI: Parti Tindakan Demokratik (DAP) enda bediri minta pilih ba sebarang bagi kerusi ba sitak menua pesisir enggau mega enda enggau bepilih ba kerusi ke udah diungkupka ngagai parti bukai dalam Pakatan Harapan (PH) maya pengawa bepilih nengeri (PRN) ti deka datai.
Chairman DAP Miri, Dr Ting Tiong Choon, madahka ba baruh sempekat PH, sesapa ke udah minta pilih ba pengawa bepilih nengeri ke suba ari sebarang parti dalam PH, nyadi (parti) deka mengkang bepilih ba endur nya, maya PRN ti deka datai.
Iya madah munyi nya lebuh ditanya sekalika sida deka ngengkahka ex-chalun PKR di DUN Marudi (maya PRN ke sebedau tu), Elia Bit minta pilih ba entara siti kerusi di DUN Baram tauka enda.
“PKR udah enggau minta pilih ba sitak nya (Baram) lalu DAP enggai ngachau kerusi ke diungkup PKR,”ku iya seraya nambah DAP deka meri sukung ngagai parti nya dikena nentuka PH ulih menang ba PRN ila.
“Nyangka mayuh orang ngumbai Elia nyereta nyadi kaban DAP laban iya deka minta pilih di Marudi tauka ba sebarang bagi kerusi ke bukai, nya kebendar enda amat,” ku iya.
Ba aum media ditu kemari, ex-Ketuai Raban Nembiak Keadilan (AMK) Baram, Elia Bit madahka iya udah ningkilka diri ari PKR enggau nyereta nyadi kaban DAP kenyau Februari nyin tadi.
Pekara nya taja pia semina dipadah enggau chara rasmi kemari ari Elia empu, berindik ari mayuh spekulasi ke bisi madahka iya nyemilik enggau Parti Pribumi Bersatu Malaysia (BERSATU) tauka Parti Sarawak Bersatu (PSB).
Ba PRN ke-11, 2016 nyin tadi, Elia ke bediri minta pilih nengah tikit PKR ba kerusi Marudi alah ngelaban chalun Barisan Nasional (BN) maya nya, Datu Dr Penguang Manggil, ke menang bulih 5,493 undi. Elia alah mit enggau bulih 4,106 undi lalu chalun ngatika diri, Louis Jalong semina bulih 56 undi aja.
Kelimpah kerusi Marudi, PKR mega enggau bepilih ba dua kerusi agi di Baram iya nya kerusi Mulu enggau Telang Usan kelimpah di kerusi Bekenu enggau Lambir dalam Parlimen Sibuti.
Pia mega, DAP enggau bepilih ba semua tiga kerusi dalam Parlimen Miri iya nya Senadin, Pujut enggau Piasau.
Nerang silik sentang pengawa milih chalun ke sekali tu, Dr Ting ke mega ex-ADUN Pujut madahka, chalun DAP ila deka dipilih ba raban peranak kandang menua tu sereta deka ditentuka komiti pemilih chalun.
“Kami enda nemu sapa bediri minta pilih ba kerusi Pujut ila, tang DAP enda enggau bepilih ba kerusi ba sitak kandang menua pesisir.
Berebak enggau nya, Elia ti madahka diri nyemilik DAP kenyau enam bulan nyin tadi besereta enggau tujuh iku bala ke bukai nyengkaum 3 iku ari PKR laban deka terus belajar enggau ngenegapka penuduk diri dalam politik.
Ku iya, iya udah begulai enggau PKR nyauka lima taun nyin tadi enggau mayuh pekara udah dipelajar iya nyengkaum ngulihka peneleba sereta bekimpin nyadi chalun ba PRN nyin suba.
Tang nyereta nyadi kaban DAP deka nambahka agi peneleba ke bisi.
“Taja aku nyereta DAP Miri, tang ukai reti aku enda ingatka sitak kandang menua pesisir, aku ngasaika peranak di kandang menua pesisir bedau sedia deka nerima ubah,” ku iya nambah.