MIRI: Peranak rumah panjai di kandang menua Bekenu dilalau nelebaka diri sereta ngena memanah peluang gaya idup 'norma' baru berindik ari pandemik COVID-19.
Menteri Muda Orang Indu, Ruang Bilik enggau Pemansang Anak Mit Rosey Yunus madah, kerejasamasemua komuniti sekalika di kandang mengeri enggau menua pesisir endang beguna ngambika ulih nagang pengelekai igi penyakit nya ti bedau punas.
“Kelimpah ngemeranka pemeresi diri di rumah, kitai mega mesti ngasika Prosedur Operasyen Standard (SOP) ti udah ditetapka kelebih agi lebuh ba palan mensia mayuh baka ngena sengkabung idung enggau mulut, seraka fizikal, ngena penuchi jari tauka suahka agi nuchi jari sereta SOP ke bukai,” ku iya.
Iya ti mega Kaban Kunsil Nengeri (ADUN) Bekenu madah munyi nya ba program Skuad Kasih Sayang (SKS) ba Rumah Ranjit, Sungai Bekelilit di Sibuti, bedau lama ti udah.
Rosey ngansak peranak di rumah panjai nya seruran ibuhka pasal igi penyakit ti udah nabanka mayuh nyawa ba selampur dunya.
Ba program nya, Rosey udah nyuaka pemeri ari baruh SKS, iya nya sebuah gerempung pengelantang pendiau ti dipejalaika ari baruh sayap Raban Indu Parti Pesaka Bumiputera Bersatu (PBB).
Pemeri pengasih nya disuaka ngagai orang lunggar umur sereta sida ti timpang pendiau (OKU) ba rumah panjai nya.
Rosey mega bisi madahka agih belanja sepenyampau RM100,000 dikena ngemanahka jalai tama ke rumah panjai nya ti dipejalaika ari baruh Opis Kereja Raya (JKR).
Pia mega nyadika tambah ba pemeri SKS nya, Rosey udah meri geran perintah ari baruh Projek Mit Menua Pesisir (MRP) sepenyampau RM3,000 bela ungkup Gerempung Indu sereta Komiti Pemansang enggau Pengelikun Genturung Pendiau (JKKK) rumah panjai nya.
Kelimpah Rumah Ranjit, Rosey mega bisi nemuai ngagai Kampung Belunok, Kelulit di Sibuti ba hari ke sebaka laban nyuaka geran MRP sepenyampau RM20,000 dikena ngangkatmanah pasar genturung pendiau sereta palan endur program berami makai ninting taun ba genturung pendiau nya.
Geran nya diterima Ketuai Genturung Pendiau (KK) iya nya Taib Bakar.
Sama bisi iya nya Sekretari Politik Kepala Menteri Sarkawi Suhaili.