Anda di sini

Perintah nengeri deka ngemansangka sekeda kandang endur di Kuching Selatan, Utara

Advertisement
 Abang Johari mendingka penerang ari Wee (kanan) pasal gambar ke dipandangka ba Galeri Pameran MBKS, kemari. — Gambar Roystein Emmor
NINGA PENERANG: Abang Johari mendingka penerang ari Wee (kanan) pasal gambar ke dipandangka ba Galeri Pameran MBKS, kemari. — Gambar Roystein Emmor

KUCHING: Perintah nengeri deka ngemansangka baru sekeda ari kandang endur ba Kuching Selatan enggau Utara nyadi sebuah mengeri besai ti moden enggau enda ngeruga pemanah asal nya.

Kepala Menteri Datuk Patinggi Abang Johari Tun Openg madahka, kena bejalaika tuju nya perintah nengeri deka meri ‘seput baru’ ngagai pemandang ke udah bisi ba dua kandang endur tu ari baruh siti pelin besai.

Pelin besai timpuh panjai tu ku iya deka dikemansang tauka dikemajuka dalam timpuh lima taun enggau kerejasama entara bandaraya enggau peribit.

“Kitai deka ngemansangka baru sekeda agi kandang endur ba Kuching Selatan enggau Utara ti udah enda dikeibuh lalu kitai deka meri ‘seput baru’ ari baruh siti pelin besai.

“Taja pia pemansang baru kandang endur nya enda mungkur begunan lama.

“Pia mega ba Kuching Utara, bisi sekeda kandang endur nya deka dikemansangka baru nengah siti perambu ti bepelasarka prinsip nya udah dipesetuju kitai,” ku iya.

Iya madahka pekara nya ba aum pengarang berita pengudah Ngintu Genap ke-32 Bandaraya Kuching ba Dataran Majlis Kuching Selatan (MBKS) ditu, kemari.

Bejaku baru Abang Johari madah, entara kandang endur ba Kuching Selatan ti deka diangkatmanah iya nya ba kandang endur di Padungan.

Lalu ba Kuching Utara tu deka mungkur sekeda kandang endur di Haji Taha enggau P.Ramlee.

Abang Johari arap bendar pengawa ngemansangka baru sekeda ari kandang endur Kuching Selatan enggau Utara deka matak pemeranak puku ngagai endur tu.

Berindik ari nya ku iya, udah bisi ke narit ati ari kompeni Jepun deka ngerembaika operasyen sida ba Zon Perindustrian Bebas Samajaya ti mungkur puku diperanak speenyampau RM20 bilion ti mega deka meri peluang kereja ngagai rayat ba nengeri tu.

Dulu ari nya lebuh bejaku ba pengerami nya, Abang Johari madah mengeri besai Kuching udah mayuh berubah dalam timpuh 32 taun tu ukai semina ba Kuching Selatan enggau Utara tang mega nyengkaum Padawan.

Tu reti nya, ku iya, mengeri besai Kuching udah berubah enggau jampat nengah pemansang pengawa berumah, komersial enggau palan rekreasyen.

Tang ku iya ke pemadu beguna perintah enggau sida bandaraya ulih nempa gaya enggau endur ke ulih alai raban bansa di mengeri Kuching ulih ngaga kaul sereta penyerakup ti tegap.

Sama bisi datai Sapit Kepala Menteri Datuk Amar Douglas Uggah Embas, Menteri Kaunsil Kandang Menua enggau Pengawa Berumah Dato Sri Dr Sim Kui Hian, Menteri Muda Pekara Islam enggau DBKU Datuk Dr Abdul Rahman Junaidi, Datuk Bandar Kuching Selatan Dato Wee Hong Seng enggau Datuk Bandar Kuching Utara Datu Junaidi Reduan.

Advertisement