Anda di sini

Peranak Miri dilalau ngasika SOP kena nentuka agi dalam Zon Gadung

Advertisement
 Ting nisil dagin korban kelai bejadi pengawa ngagihka dagin nya di Kampung Senadin Jaya kemari.
BEJADI: Ting nisil dagin korban kelai bejadi pengawa ngagihka dagin nya di Kampung Senadin Jaya kemari.

MIRI: Kerejasama peranak Miri dalam ngasika jaku gerah ari raban bekuasa enggau ngemeranka seraka fizikal sereta ngena sengkabung idung enggau mulut ba palan mensia mayuh nentuka Miri mengkang dalam status Zon Gadung pandemik COVID-19.

Menteri Muda Dagang Temuai, Seni enggau Main Asal Datuk Sebastian Ting ngansak peranak ngasika atur Prosedur Operasyen Standard (SOP) ti udah ditetapka ke pengelikun semua orang.

“Beguna amat kitai semua ngasika atur nya. Kitai (Miri) udah 82 hari nyadi Zon Gadung lalu tu pekara ke chukup manah. Nya alai, kitai patut bejalaika tanggungpengawa mutuska rentayan pengelekai igi penyakit tu,” ku iya nerang lebuh ditelefon Utusan Borneo kemari.

Miri iya nya mengeri besai keterubah di Sarawak ti ditukuka zon gadung ti dipadahka Komiti Mutarka Penusah Ngenyit Bagi Menua Miri kena 10 Mei nyin tadi.

Berengkah 1 Ogos, peranak ditetapka mesti ngena sengkabung idung enggau mulut lebuh ba palan mensia mayuh.

Ukum RM1,000 ba baruh Akta 342 (Akta Nyeliah enggau Nagang Penyakit Berampit 1988) deka ditinggang ngagai sida ti ngelanggar atur ke baru nya.

Nerang silik agi sentang pengerami Hari Raya Aidiladha ti diintu ensanus, Ting ke mega Kaban Kunsil Nengeri (ADUN) Piasau muji kerejasama peranak ngasika SOP ngintu pengerami nya.

“Pengandal ngintu pengeramo nya tetap bisi taja kitai dalam ‘norma’ baru diatu,” ku iya nerang ke dikangau datai ke surau enggau masjid ditu ngagihka dagin ‘korban’.

Ting madahka, pengerami Hari Raya Korban mega diintu dikena bekunsi pengerindu sereta jereki ngagai raban kurang penatai pemisi.

Kena ba taun tu, Ting udah meri bantu ungkup enam genturung pendiau (kampung) ditu kena meli siku chapi.

Penerima tu iya nya Kampung Pulau Melayu, Kampung Lereng Bukit, Kampung Haji Wahed, Kampung Wireless, Kampung Luak enggau Kampung Senadin Jaya.

“Aktiviti tu berengkah kemari (31 Julai) di Kampung Pulau Melayu lalu ditampung baru sehari tu (2 Ogos),” ku Ting.

Kemari, lebih 100 peranak nyengkaum raban indai tunggal, seranta enggau orang lunggar umur ari Kampung Senadin Jaya nerima pemeri dagin korban.

Advertisement