Anda di sini

LSS deka mansutka notis ngelalau mensia mayuh ti ngena servis bot ekpres Kuching/Sibu

Advertisement
HATTA
HATTA

SIBU: Kaunsil Sungai Sarawak (LSS) deka mansutka notis dikena ngelalau mensia mayuh ti ngena servis bot ekspres Kuching/Sibu berengkah ari 1 nyentuk 14 Ogos, ngambika minta Surat Pemendar Polis sebedau meli tikit tambang.

Sapit Pengatur LSS Pampang II, Hatta Morshidi madahka notis nya deka diberi enggau naka pengelengkas.

“Servis bot ekspres ungkup jalai Kuching/Sibu beoperasyen baka selama, tang orang tambang dilalau ngambika minta pemendar ari raban polis sebedau dikemendarka tama (ke dalam bot ekspres),” ku iya madah ngagai pengarang berita, empai lama.

Ku Hatta, atur seraka fizikal sereta ngena sengkabung idung enggau mulut agi dikemeranka baka selama.

Nambahka tu ku iya, bot ekspres agi ulih mai raban orang tambang enggau penyampau ke maksimum nitihka Permit Perengka Pengangkut Sungai.

Nitih ku Hatta, penyuah servis pejalai bot ekspres entara Kuching enggau Sibu mengkang sehari sekali.

Ku iya, jam bot ekspres berangkat ari Sibu ke Kuching iya nya pukul 11.30 pagi lalu pukul 8.30 pagi ari Kuching ke Sibu, ninting hari.

Bedau lama ke udah, Menteri Perengka Pengangkut Datuk Lee Kim Shin dalam siti penerang madahka, mensia mayuh ti merambu deka mindah ari Zon 1 enggau 2 di nengeri tu, patut minta surat pemendar ari polis enti sida deka nguna perengka pengangkut mensia mayuh, nyengkaum kompeni penerebai bilun enggau bot ekspres.

Tu berindik ari pengawa ngempang jalai ti dipejalaika Komiti Mutarka Penusah Ngenyit Nengeri Sarawak (JPBNS), berengkah ari 1 nyentuk 14 Ogos tu.

Senentang pekara ke bukai, Hatta madahka mensia mayuh enggau raban pengemeran bot ekspres udah meri kerejasama ke chukup manah ngagai raban iya.

Advertisement