KUCHING: Kepala Menteri Datuk Patinggi Abang Johari Tun Openg madah enda kiruhka pasal serakup Muafakat Nasional (MN).
Ku iya madah enggau bebendar, dalam runding iya diatu semina pasal COVID-19 ke agi balat nyadi kelebih agi ba Kuching ti patut dikemeratka.
“Runding aku pasal COVID-19. Kitai patut meda pekara tu, tu balat nyadi sereta Kuching udah nyadi Zon Mirah,” ku iya.
Iya madahka pekara nya lebuh dipinta ngenang pasal pemutus UMNO pansut ari perikatan Nasional (PN) lalu masuk MN begulai enggau PAS, ba aum pengarang berita ba Majlis Bandaraya Kuching Selatan (MBKS) ditu, kemari.
Dulu ari nya Abang Johari datai bejadi Ngintu Genap Ke-32 Bandaraya Kuching ba Dataran MBKS ditu.
Ditanya sekalika bisi randau entara MN enggau Gabungan Parti Sarawak (GPS), Abang Johari ti mega Chairman GPS madahka GPS iya nya GPS.
“Kitai bisi perintah PN Plus GPS. Nya alai kitai GPS,” ku iya nyaut pandak ngagai raban pengarang berita.
Bekaul enggau pekara nya, Presiden UMNO Datuk Seri Ahmad Zahid Hamidi dalam siti penerang ba Facebook iya madah Presiden BERSATU Tan Sri Muhyiddin Yassin ti mega Menteri Besai deka masuk MN.
Taja pia, ku Abang Johari madah, nadai penetap bekaul BERSATU deka masuk MN.
Ngenang pasal politik di Sabah ti dipadah bepun ari ulah betukar parti (lompat parti), Abang Johari madah, nya hal tauka pekara ba Sabah.
Iya mega enggai ngenang panjai pasal pekara tu ti dipadah iya nyadi tanya tang baka ti melaba.