SIBU: Siku orang agi ulih dirampit COVID-19 enti ba palan mensia mayuh taja ngena sengkabung idung enggau mulut.
Menteri Muda Kaunsil Kandang Menua enggau Pengawa Berumah Dr Annuar Rapa’ee madahka, ngena sengkabung idung enggau mulut meri pengelikun ngagai sida ti ngena nya ba palan mensia mayuh tang nadai jamin 100 peratus enda dirampit igi penyakit nya.
Dalam pekara tu, Dr Annuar ngelalau mensia mayuh sentang guna nitihka 3C iya nya nyeliahka palan mensia mayuh (crowded places), palan ke sempit (confined places) enggau bejaku semak enggau pangang diri (close conversations).
“Kitai patut nyeliahka diri ari ngelawa palan mensia mayuh enggau naka ulih.
“Tang enti tu enda ulih diseliah, kitai patut ngena sengkabung idung enggau mulut dikena nyaga diri enggau orang bukai ari kena rampit COVID-19,” ku iya ngelalau maya dikerandau di Surau Darul Islam di Jalai Bandong ditu, kemari.
Sentang pengawa ngagihka dagin ungkup Hari Raya Aidiladha ba kandang sitak Nangka, iya madah sebuah palan ngagih ke ngerejaka pengawa nya ti deka ngagihka ngagai sida enggau nitihka atur Prosedur Operasyen Standard (SOP) kena nyeliahka COVID-19.
Nitihka Dr Annuar, raban PBB ditu mantu ngagihka dagin ngagai urung 923 iku ti begunaka nya.
“Bisi 23 iku chapi dibunuh ba Hari Raya Aidiladha ditu, nyengkaum 23 sitak.
“Udah tentu, sekeda sitak ngembuan lebih ari siku chapi laban sida ngatur pengawa nya ba inisiatif sida empu,” ku iya.