SIBU: Gerija Katolik Sibu ngelalau sida ti datai ari Zon 1 enda enggau besembiang misa Hari Minggu dalam timpuh sementara ke diatu.
Bishop Katolik Sibu, Right Reverend Joseph Hii madahka gerija udah meri notis ngagai tetiap gerija ba baruh pegai iya ke alai sida tu mesti kuarantin pengelama 14 hari sebedau ulih datai besembiang ke gerija ditu.
“Sida ke baru pulai ari Zon 1 kelebih agi Kuching enggau Samarahan dilalau ngambika enda enggau sembiang misa. Kitai endang patut bejejaga,” ku iya lebuh ditelefon, kemari.
Gerija Katolik ba kandang menua Sibu udah beoperasyen baru enggau bererenggat sembiang misa berengkah 20 Jun nyin tadi.
Naka diatu, nitihka Hii, raban gerija meri kerejasama penuh dalam ngasika prosedur operasyen standard (SOP) ti udah ditetapka perintah nengeri.
“Kami endang bebendar dalam nentuka SOP dititihka. Kami deka bejejaga agi dalam nentuka semua orang likun,” ku iya enggau nyemetak.
Iya mega madahka sekeda gerija udah natak penyampau orang besembiang ngagai 250 iku dalam siti timpuh, lalu gerija ke bukai agi natak penyampau orang besembiang ngagai 100 iku.
Bisi 12 gerija enggau urung 20 gerija mit ti ari baruh pegai Bishop Katolik Sibu.