KUCHING: Timpuh operasyen dagang stesyen minyak enggau kilang ba Zon 1 ti mungkur bagi Menua Kuching, Samarahan enggau Serian iya nya 24 jam berengkah 1 Ogos 2020.
Sapit Kepala Menteri, Datuk Amar Douglas Uggah Embas madahka, pengempu tauka pengemeran stesyen minyak enggau kilang ti beoperasyen baka selama patut madah ngagai Komiti Mutarka Penusah Ngenyit Nengeri Sarawak (JPBNS).
Iya madahka, sebedau tu kala dipadahka semua pengawa dagang dalam Zon Mirah enggau Kuning iya nya ari pukul 6 pagi ngagai pukul 10 malam.
“Tadi (kemari) maya baum pekara tu dikerandauka enggau panjai sereta kami ngaga pemutus iya nya pengempu stesyen minyak enggau kilang dikemendarka beoperasyen baka ngelama tu, enti sida sebedau tu beoperesyen 24 jam reti iya sida ulih beoperasyen 24 jam.
“Atur tu berengkah dipejalaika kena 1 Ogos 2020. Taja pia pengempu stesyen minyak enggau kilang enti sida ngaga pemutus beoperesyen 24 jam, sida patut madahka pemutus nya ngagai JPBN,” ku iya seraya madahka nya ukai minta pemendar tang semina madah ngambika komiti nemu.
Uggah ti mega Chairman JPBN mansutka pekara nya ba aum pengarang berita COVID-19 Sarawak ti diatur ba Begunan DUN Lama ditu, kemari.
Berebak enggau tu Uggah madahka baru iya nya berengkah 1 Ogos 2020 semua rayat Sarawak enda tau enda ngena sengkabung idung enggau mulut maya ngelawa palan mensia mayuh, palan bebeli barang, ba perengka pengangkut mensia mayuh, pasar tamu enggau kedai makai.
“Aksyen deka dipejalaika raban penerit adat nyema pengempu premis enggau penguna ditemu enda ngena sengkabung idung enggau mulut,” ku iya.